Eanas stuora ja deaŧalaš sámepolitihkalaš áššit maid Ovttasbargoráđđehus lea álggahan ja duohtan dahkan ovdanbuktojuvvoje Riddu Riđđu festiválas Olmmáivákkis Romssas odne. – Sápmelaččat sáhttet lea duhtavaččat dainna maid ráđđehus lea buvttahan sámepolitihkalas, dadjá stádačálli Anders J. H. Eira Gielda- ja guovludepartemeanttas.

Stádačálli váldá ovdan earenoamážit golbma suorggi – sámegiela, sámi dutkama ja vuoigatvuođagažaldaga. – Dán ráđđehusas lea sámegiella guovddážis, ja dat bargá dan ala ahte sámegiella šattašii dakkárin maid sáhttá atnit ja mii lea eallime juohke dilálašvuođain, maiddái IT-oktavuođas, dadjá Eira. – Go juo dán rádjái leat buvttahan ná ollu de lea mus hui buorre doaivva olahit mihttomeari mii lea ahte sámegiela galgá sáhttit atnit juohke IT-oktavuođas, dadjá Eira.

Sámi dutkan lea ollu nannejuvvon dan rájes go ovttasbargoráđđehus ásahuvvui golggotmánu 2001:s. Sierra stuoradiggedieđáhus sámi alit oahpu ja dutkama birra lea almmuhuvvon, ja boađusin das lea ahte juolludeamit sámi dutkamii leat lassánan beliin, ja dál dáidá Sámi allaskuvla beassat šaddat dieđalaš allaskuvlan.

- Go lea sáhka vuoigatvuođagažaldagain de lea dát ráđđehus ovddidan Finnmárkolága ja dahkan ahte juoga dáhpáhuvvá dán hui deaŧalaš áššis. Dat lea iešalddis deaŧalaš politihkalaš bargu, dadjá stádačálli Eira. – Áiggun vel earenoamážit váldit ovdan ahte dát ráđđehus lea – maŋŋel go ášši lea vuogádagas jorran goit 14 jagi – evttohan čovdosa daidda sápmelaččaide geat leat massán skuvlla nuppi máilmmi soađi geažil, dadjá Eira.

Sámi ealáhusat lea maid nannejuvvon obbalaš ealáhuspolitihka bokte. Vearut leat geahpiduvvon ja historjjalaččat vuollegis reantu dagaha vejolažžan investerema ja ovdáneami sámi guovlluin, lohká Eira.

Ja lea maid leamaš deaŧálaš buktit oidnosii man girjái sápmi lea. Dan oktavuođas lea historjjalaš dat mii dán jagi rájes galgá leat Sámiálbmot beaivvi guovvamánu 6. beaivvi. Levgen, ii ge unnimustá dat ahte dát beaivi galgá merkejuvvon buot kalendariidda, lea mielde oidnosii dahkamis ja beroštumi duddjomis sápmelaččaid ja sámi diliid birra – ii unnimustá stuora servodagas. Danne go sámivuođa oidnosii buktin veadjá leat buot deaŧaleamos doaibma, loahpaha stádačálli Anders J. H. Eira.

Muđui deaŧalaš sámepolitihkalaš áššit, geahča ovttasbargoráđđehusa sámepolitihkalaš rehketdoalu dás.