Gielda- ja guovlodepartemeanta evttoha rievdadit sámelága § 2-4, dainna ulbmilin ahte ásahit Sámediggái njeallje dássenmandáhta ja várreáirasiid.

Rievdadusevttohus mielddisbuktá ahte sámediggeáirasiid lohku lassána 39 áirasis 43 áirasii. Mihttomearrin lea ahte láhkarievdadeapmi gusto 2005 válgga rájes.

- Dáinna evttohusain váldit mii vuhtii moaitámušaid mat leat leamaš dálá válgaortnegii, erenoamážit stuorámus válgabiiriin, main lea unnit ovddasteapmi go válgabiiriin main leat unnán olbmot jienastuslogus, lohká gieldaministtar Erna Solberg. – Mii evttohit ahte njeallje stuorámus válgabiire mat olahit eanemus dohkkehuvvon jienaid válggas, ožžot ovtta dássenmandáhta guhtege. Mun navddán dát hástala válgabiiriid oččodit eanebuid čálihit iežaset jienastuslohkui ja ahte eanebut jienastit boahttevaš válggain, oaivvilda gieldaministtar.

Rievdadusevttohusa ulbmil lea njulget oasi dan dássehisvuođas mii dál lea unnimus ja stuorámus válgabiriid ovddasteamis Sámedikkis, seammás go eat unnit smávimus biiriid ovddasteami. 2001 válggas ledje stuorámus válgabiiriid dohkkehuvvon jienaid logut 1066 Guovdageainnus ja 910 Kárášjogas, ja unnimus biiriin fas 121 Davit Nordlánddas ja 234 Lulli-Romssas. Stuorámus vejolašvuohta lasihit namaid jienastuslohkui dáidet leat muhtumiin dain biiriin gos dál leat unnimus logut.

- Mii evttohit maiddái ahte Sámediggi dál sáhttá gáibidit válgalisttuid evttoheddjiid fuolahit unnimusat 40 % sohkabealovddasteami listtuin mat servet válgii, lohká gieldaministtar Solberg.

Departemeanta ii čuovvol Sámedikki evttohusa das ahte njeallje ođđa dássenmandáhta galget mannat dan sohkabeallái mas lea unnit ovddasteapmi. Eai guđege eará válggas leat mearrádusat sohkabealvuoruhemiid birra, ja dalle ii berre álbmotválljejuvvon Sámedikkis ge leat láhkamearriduvvon sohkabealvuoruheapmi. Bellodagat, organisašuvnnat ja válgalisttut berrejit ain ieža atnit ovddasvástádusa das ahte fuolahit sohkabealovddasteami listtuin mat servet válgii.

Evttohus sáddejuvvo dál gulaskuddamii buot suohkaniidda, Sámediggái, departemeanttaide, sámi organisašuvnnaide ja buot listtuide mat serve maŋemus sámediggeválgii. Gulaskuddanáigemearri lea borgemánu 20. beaivi.

Høringsbrevet.