Ráđđehus evttoha lasihit ruhtajuolludeami gitta 592,2 miljovnna ruvnno rádjái earenoamáš sámi ulbmiliidda 2005:s. Oktiibuot lea lassáneapmi 34,8 miljovnna ruvnno.

– Ovttasbargoráđđehus lea maid boahtte jahkái vuoruhan lasihit sámi bušeahtaid, ja dainnalágiin čuovvola iežas ambišuvnna nannet sámi giela, kultuvrra ja ealáhusaid, dadjá stádaráđđi Erna Solberg.

Suohkan- ja guovlludepartemeantta bušeahta bokte evttoha ráđđehus lasihit ruhtajuolludeami sámi áigumušaide ja Sámidiggái 6,3 miljovnna ruvnnuin. Sámediggi oažžu maid juolludemiid Mánáid- ja bearašdepartemeanttas, Dearvvašvuođadepartemeanttas, Kultur- ja girkodepartemeanttas, Eanadoallodepartemeanttas, Oahpahus- ja dutkandepartemeanttas ja Olgoriikkadepartemeanttas. Oktiibuot evttohit juolludit 234 miljovnna ruvnno Sámediggái 2005:s.

Ráđđehus lasiha maid juolludeami Álgoálbmot vuoigatvuođaid gelbbolašvuođaguovddážii, nu ahte ollislaš juolludeapmi šaddá 3,25 miljovnna ruvnno.

Sámi oahpahus ja dutkan leat okta deaŧaleamos sámepolitihkalaš nannensurggiin. Eanet ja eanet mánát ja nuorat háliidit oahpahusa sámegillii ja sámegielas. Oahpahus- ja dutkandepartementa árvala dan dihte lasihit juolludeami oahpahussii sámegielas ja sámegillii 36,9 miljovnna kruvnnos 40,3 miljovnna kruvdnui. Lassáneapmi lea 9,2 proseanta. Sihkkarastin dihte alit oahpu oahppogirjjiid almmuheami de lasihuvvo bušeahttarámma Sámi allaskuvlii 500 000 ruvnnuin. Ráđđehus evttoha maid juolludit sullii 300 000 ruvnno Bodeaju allaskuvlii ja Davvi-Trøndelága allaskuvlii goabbái ge vai julevsámegiella ja oarjelsámegiella nannejuvvo ja ovdánahttojuvvo. Ráđđehus atná deaŧalažžan nannet sámegiela dutkangiellan. Danne ráđđehus evttoha lasihit juolludeami Norgga dutkanráđi sámi dutkanprográmmii 1 miljovnna ruvnnuin. Oktii dainna juolludemiin de biddjojuvvo oktiibuot sullii 9 miljovnna ruvnno sámi dutkanprográmmii 2005:s.

Ráđđehus áigu čuovvolit psyhkalaš dearvvašvuođadikšunbarggu sámi álbmogis. Ja danne ásaha našuvnnalaš gelbbolašvuođabásaid Kárášjohkii ja Levdnjii. Vuoruhuvvon doaimmat leat bearašossodaga huksen ja heahtesajiid ásaheapmi nuoraide. Juolludeapmi evttohuvvo lasihuvvot 13 miljovnna ruvnnos gitta sullii 18 miljovnna ruvdnui 2005:s.

Ráđđehus evttoha 2005:s juolludit 12 miljovnna ruvnno Nuortasámiid museuma viidáseappot prošekteremii ja huksemii. Oktiibuot lea museuma huksenbušeahtta 30 miljovnna ruvnno mángga jagi badjel. Museuma prošekteremat leat álggahuvvon ja huksemat galget álgit 2005 geasi.

Sámegielat aviissain lea deaŧalaš bargu seailluhit ja ovdánahttit sámi čállingiela. Danne ráđđehus evttoha lasihit juolludeami sámi aviissaide Kultur- ja girkodepartemeantta bušeahta bokte 11,6 miljovnna ruvnno rájes gitta 12,9 miljovnna ruvnno rádjái, lassáneapmi lea 9,3 proseantta.

Nannen dihte ovttasbarggu davviguovlluid boazodoalus, áigu ráđđehus ruhtadit riikkaidgaskasaš fága- ja gaskkustanguovddáža Guovdageidnui vuosttaš jahkebeali 2005:s. Guovddáš galgá sihkkarastit dieđuid juohkima ja lonohallama, ja ovddidit árktáláš guovlluid boazodoalloálbmogiid fágalaš ovttasbarggu. Bargu galgá leat boazodolliid, eiseválddiid, dutkan- ja eará fágabirrasiid ja riikkaidgaskasaš organisašuvnnaid ja ovttasbargoorgánaid ektui. Gielda- ja guovludepartemeanta evttoha juolludit 750 000 ruvnno guovddážii. Eará departemeanttaid bušeahtaid bokte maid juolluduvvojit ruđat dan guovddážii.

Listu juolludemiin mearriduvvon sámi áigumušaide (1000 ruvnnuiguin):

1) Mearriduvvo maŋŋel.

Muđui juolluduvvojit ruđat sámi doaimmaide kapihttaliid ja poasttaid bokte mat eai vel sáhte mearriduvvot. Geahča ”Juolludeamit sámi doaimmaide stádabušeahtas 2005” (H-22/04).