3 sámi nuora leat nammaduvvon ”sámi ofelažžan”. Ofelaččat galget johtit ja oahpahit olbmuide sámiid dili birra, ja ulbmiljoavkun leat erenoamážit eará nuorat.

Gielda- ja guovludepartemeanta lea bidjan johtui Sámi ofelaččat prošeavtta gilvin dihte dieđuid sámi kultuvrra birra. Golbma stipeanda juhkkojit sámi nuoraide geat ovtta jagi galget juohkit dieđuid sámiid birra earret eará finadettiin skuvllain, organisašuvnnain ja lágidemiin miehtá riika. Soitet maid šaddat barggut olgoriikain.

- Ain leat beare máŋggas geat dihtet beare unnán sápmelaččaid birra, sin kultuvrra ja eallinvuogi birra, geat sii leat ja gos sii orrot, ja makkár vuoigatvuođat sis leat Norgga álgoálbmogin, dadjá gielda- ja guovluministar Erna Solberg. – Danne áigu Ráđđehus bargat ollu dainna ahte addit rievttes dieđuid sámi kultuvrra birra. Danne lean ásahan dán sámi ofelaš-ortnega, dadjá Solberg.

Namat dan golmma ofelaččas leat Ellinor Marita Jåma, Groangke, 24 jahkásaš, Inga Mikkelsen, Ájluokta, 18 jahkásaš og Ánte Siri, Guovdageainnu, 20 jahkásaš. Stádačálli Anders J. H. Eira Gielda- ja guovludepartemeanttas almmuhii daid Riddu Riđđu festiválas Olmmáivákkis Davvi-Romssas bearjadaga 16.7.04. Sierra komitèa lea válljen dáid nuoraid lagabui 20 ohccis. Mii leat válljen nuoraid geain lea beroštupmi, geat máhttet muitalit ja geat leat hutkat. Dát golbma ofelačča leat lullisámi-, julevsámi- ja davvisámiguovllus eret.

Nuorat galget leat hálddahuslaččat čadnon Sámi allaskuvlii Guovdageainnus. Skuvllas lea ovddasvástádus dán prošektii.