Justis- ja politidepartemeanta ja Gielda- ja guovlodepartemeanta, mat vástidit ođđa finnmárkkulágas, deaivvadedje Sámedikkiin ja Finnmárkku fylkkagielddain 07.07.2005 Girkonjárggas. Čoahkkima maŋŋá departemeanta lea sádden reivve fylkkagildii ja Sámediggái ja evttohan finnmárkkulága ollašuhttinplána.

Evttohusa mielde Finnmárkkuopmodaga stivra bargagoađášii boahtte jahkemolsašumi rájes, ja oaččošii dárbbašlaš fápmudusaid geavatlaš ráhkkaneapmái, mii dárbbašuvvo eatnamiid sirdimii Statsskogas. Áigomuš lea ollašuhttit sirdima jagi 2006 nuppi njealjádasas. Finnmárkkukommišuvnna ja Meahcceduopmostuolu ráhkkananbarggut leat viidát. Dát láhkaoassi sáhttáge boahtit fápmui 01.01.2007, ja kommišuvdna sáhttá dalle bargagoahtit kártemiin.

- Dáinna evttohusain sihkkarastit nu jođánes ovdáneami go vejolaš, seammás go barggu dahket vuđolaččat, stáhtačálli Ellen Inga O. Hætta dadjala. – Mu mielas orui ahte Girkonjárgga čoahkkinoasseváldit ledje ovtta oaivilis váldoáššiin, ja vuorddán dál oažžut vástádusa Finnmárkku fylkkagielddas ja Sámedikkis. Mii leat gergosat johttáhit iežamet oasi, nu ahte lága sáhttá ollašuhttit buoremus lági mielde, Hætta dadjá.

Ollusat leat leamaš eahpesihkkarat dan hárrái, maid Finnmárkkuláhka duohtavuođas sisdoallá ja mo dat váikkuha Finnmárkku ássiide ja oppa álbmogii. – Vuosttaš bargomuttus mii sáddet diehtogihppaga lága sisdoalu birra buot Finnmárkku dállodoaluide, Ellen Inga O. Hætta muitalastá. Mii ráhkadit neahttasiidduid, main gávdnet dieđuid finnmárkkulága birra. – Dan láhkai besset finnmárkolaččat lohkat vuđolaš dieđuid ja diehtigoahtit maid láhka mearkkaša ovttaskas ássiide. Mii sávvat ja jáhkkit ahte finnmárkkulágas lea ávki sihke sápmelaččaide ja buohkaide earáide, geat orrot Finnmárkkus, stáhtačálli Hætta loahpaha.