- Norga galgá leat ovddasmannin riikkaidgaskasaš ovttasbarggus Arktalaš ráđis nannemiin boazodoalu álgoálbmotealáhussan, lohká gielda- ja guovloministtar Erna Solberg. Stáhtaráđđi rahpá odne ođđaásahuvvon riikkaidgaskasaš boazodoallofága- ja gaskkustanguovddáža, mii lea Guovdageainnus. Guovddáš lea Gielda- ja guovlodepartemeantta, Olgoriikkadepartemeantta ja Eanandoallo- ja biebmodepartemeantta ovttasbargoprošeakta.

- Ráđđehus lea iežas álgoálbmot- ja davviguovlluidpolitihka vuoiŋŋas juolludan ruđa ásahit riikkaidgaskasaš boazodoalloguovddáža Guovdageidnui. Dát lea mielde bisuheame ja viidásit ovdánahttime guoddevaš boazodoalu davviguovlluin ja nanneme riikkaidgaskasaš boazodoalloovttasbarggu, man boazodoallit ieža álggahedje 15 jagi dássái, lohká eanandoallo- ja biebmoministtar Lars Sponheim.

Dál fátmmasta boazodoalloovttasbargu 20 iešguđet čearddalaš joavkku mat doaimmahit boazodoalu viiddis guovlluin oktiibuot ovcci stáhtas golmma máilmmeoasis, Kiinna, Mongolia ja Ruošša rájes nuortan gitta Alaska ja Kanada rádjái oarjin. Ráđđehus lea deattuhan ahte boazodoalloálbmogiin ja sin organisašuvnnain lea lagas oktavuohta guovddážii. Lea láhččojuvvon nu ahte guovddáš ásahuvvo ja jođihuvvo ovttasráđiid Máilmmi boazoálbmogiid servviin. Maiddái stivračoahkkádus čájeha riikkarájiid rasttideaddji boazodoalloovttasbarggu.

- Boazodoalus lea guovddáš sajádat davviguovlluid álgoálbmotservodagaid seailluheamis ja ovdánahttimis. Ealáhusas leat oktasaš hástalusat davviguovlluid riikkain, earret eará árbevirolaš máhtu ávkkástallama dáfus. Lagat ovttasbargu šaddá ávkin, lohká stáhtačálli Vidar Helgesen, gii ovddasta Olgorriikkadepartemeantta ráhpandoaluin.

- Riikkaidgaskasaš boazodoallofágalaš- ja gaskkustanguovddáža ásaheapmi lea buorre čuovvoleapmi dan boazodoalloovttasbargui man Norga lea jođihan Arktalaš ráđis, lohká son.

Guovddáš galgá doaibmat dieđuid, vásáhusaid ja máhtuid gaskkusteami ja lonohallama guovddážin, áššiin mat gusket boazodoalu eavttuide, kultuvrii ja ekologiijai, dás maiddái dutkanbohtosiidda. Guovddáš galgá sihkkarastit diehtosirdáseami máilmmi boazodoalloálbmogiid gaskka, ja boazodoalloálbmogiid ja dutkan- ja fágabirrasiid, ovttasbargoorgánaid ja iešguđet riikkaid almmolaš eiseváldiid gaskka.

- Mii sávvat ahte guovddáš sáhttá leat mielde áimmahuššame ja viidáseappot gaskkusteame árbedieđuid, nu ahte maiddái dát dieđut boahtteáiggis sáhttet leat mielde álgoálbogiid ealáhusaid hálddašeamis ja daid guovlluid gos álgoálbmogat ásset, lohká gielda- ja guovloministtar Erna Solberg.

• Riikkaidgaskasaš boazodoallofága- ja gaskkustanguovddáža stirvra (Preassadieđáhus 30.08.2005)