Lea gal válgagižžu, muhto movt dál de leaš, de ferte duohtadieđuid atnit vuođđun.

Roger Hansen geažuha aviisačállosis ahte Guovdageaidnu lea váldon mielde Finnmárkku nannemii dan dihte go lea mu ruovttubáiki. Bargguhisvuođa statistihkas oidno čielgasit ahte Guovdageaidnu lea okta dain suohkaniin gos lea alimus bargguhisvuohta dál, ja nu leage Guovdageainnus leamaš guhká. Mun imaštalan Roger Hansena, gii lea sátnejođiheaddji ja dasa lassin Finnmárkku Bargiidbellodaga jođiheaddji, go nu unnán diehtá iežas fylkka dilálašvuođaid birra. Dain Finnmárkku 11 suohkaniin mat ožžo ruđa ealáhusfoanddaide, lea Láhpis stuorámus bargguhisvuohta, namalassii 11,7 %. Dasto lea Guovdageainnus 11,3 %, Várggáin 10,9 % ja Hasviikas 9,7 %, ja fas dain eará suohkaniin lea bargoveaga bargguhisvuohta 9 % ja 2,6 % gaskka.

Stuoradikki mearrádusas juovlamánu 17. b. 2004 juolluduvvui 75 milj. kr "doaimmaide mat sáhttet láhčit dili ođđa bargosajiide Várggáin ja Finnmárkku eará báikegottiin mat leat seammá dilis".

Dát mielddisbuktá ahte mearrádusas ii daddjo mihkkege das ahte ruđat galge juolluduvvot duššefal suohkaniidda mat gohčoduvvojit "riddosuohkanin", ja mun oaivvildan leat dehálažžan oaidnit ollisvuođa dán liigenannema oktavuođas, iige geahččat suohkaniid sierralagaid. Mun čujuhan maid ahte Porsáŋggu ealáhusfoanda oaččui ruđaid dan dihte go Porsáŋgu lea nuppástuhttinsuohkan.

Mii guoská Fløtten-lávdegotti doaibmaplána doaimmaid čađaheapmái ja áigi mii gollá ovdalgo ruđaid sáhttá olggosmáksit, de lea sáhka das makkár doaimmat galget álggahuvvot. Fitnodatdoaimmaide, gelbbolašvuođaloktema doaimmaide, ealáhusgárddiide jna, leat mu dieđus ráhkaduvvome ohcamat/doaibmaplánat ovttasráđiid Innovasjon Norge-ásahusain.

Ruđat bargomárkandoaimmaide golmma suohkanii, Bearalváhkái, Várggáide ja Hasviikii, máksojedje njukčamánu 2004' loahpageahčen.

5 milj. kr lea várrejuvvon nannet suohkaniid ealáhusfoanddaid čuovvovaš 11 suohkanis: Davvesiida, Gáŋgaviika, Láhppi, Hasviika, Muosát, Bearalváhki, Porsáŋgu, Báhcavuotna, Davvinjárga, Guovdageaidnu ja Várggát. Gieldda- ja guovlludepartementa juolludii ruđaid reivvestis njukčamánu 22.b.2005, ja ruđat olggosmáksojedje geassemánu/suoidnemánu molsumis.

Ja fas dat 8,4 milj. kr maid Fløtten-lávdegoddi doaibmaplánastis evttohii lassin Várggát, Gáŋgaviika, Hasviika ja Láhpi suohkaniid ealáhusfoanddaide, dát ruđat manne suohkaniidda dán vahku.

Go juo Gáŋgaviika lea diehtán ruđaid birra guhkes áiggi, de lei Roger Hansen berret atnit áiggi buoret áššiide, nu movt ráhkkanahttit konkrehtalaš doaimmaid, dan sadjái go dálá Ráđđehusa moaitit. Jus liigeruđat galget ábasládje ávkkuhit, de lea áibbas dárbbašlaš bures plánet ovdalgo doaimmat álggahuvvojit.