Buorit guohtumiid ja miessás jagiid dihte lea boazolohku lassánan. Jus guohtuneatnámat lássašuvvet heajos jagi dihte ja boazolohku lea ain nu stuoris go lea, de sáhttá dat mielddisbuktit surgadis dili boazodollui. Lea dan dihte dehálaš oaččuhit boazologu dasa maid guohtuneatnamat girdet.

Stádabušeahtas 2005:as lea departemeantta evttohan máŋga doaimma mii galgá sihkkarastit njuovvama ja biergojođu mii dárbbašuvvo. Lea evttohuvvon ráddjet 9 milljuvnna ruvnno Boazodoallohálddahusa kapihttalii 1147 mii galgá geavahuvvot Boazodoallostivrra mearrádusa ektui, mii lea alimus boazolohku geasseguohtunguovlluin Oarje Finnmárkkus. Juolluduvvon ruhtá galgá geavahuvvot bonusortnegin ja máksojuvvo sidjiide geat šiehtadusa mielde eaktodáhtolaččat unnidit ealuidis dahje áibbas heitet boazodoaluin. Šiehtadusa eavttuid mielde máksojuvvo vel dasa lassin 5 ruvnno kilos juohke bohcco nammii mii njuvvojuvvo unnideami váras jagi 2004/2005. Njuovvandoarjaga ulbmil lea lasihit njuovvama ja biergojođu, ja addit vejolašvuođa njuovahagaide vurkkodit bohccobierggu.

Dasa lassin leat šiehtadus-bealálaččat ovttaoaivilis ráddjet oktiibuot 8 milljuvnna ruvnno boazodoallošiehtadusa bokte, mii galgá ruhtádit earret eará bohccobierggu márkánfievrredeami, ja daguhit ahte njuovvan lassana.