Oljo- ja energidepartemeanta almmuha odne stuoradiggedieđáhusa petroleumdoaimma birra. Dieđáhus govvida norgga petroleumpolitihka ovdáneami ovddosguvlui, ja das meannuduvvojit maid sámi beroštumit.

- Ráđđehussii lea deaŧalaš sihkkarastit sámi ealáhusaid ja sámi kultuvrra luondduvuođu, dadjá oljo- ja energiministtar Einar Steensnæs.

Norgga stádas lea, olles Norgga álbmoga ovddas, eaiggáduššanriekti buot petroleumii mii lea meara vuolde ja das lea earenoamáš riggodathálddašan riekti. Dan cealká petroleumláhka ja dat lea maid vuođđuduvvon álbmotrievttis. Petroleumriggodagaid galgá guhkit áigge jurdagiin hálddašit vai dat boađáše olles servodahkii ávkin. Seammas lea deatalaš čuovvut ILO-konvenšuvnna nr. 169 álgoálbmogiid birra go lea sáhka prosessuála njuolggadusain álgoálbmot guovlluid riggodagaid geavaheami oktavuođas.

- Dás lea deaŧalaš doarvái čuvget váikkuhusaid sámiid dillái. Danne galgá boahttevuođa rogganrusttegiid oktavuođas leat váikkuhusčielggadeami neavvačállosis čállojuvvon ahte sámiid beroštumit ja boazodoalloberoštumit galget doarvái čuvgejuvvon dakko gokko dat lea relevánta, dadjá Steensnæs.

Stuoradiggi lea dohkkehan Snøhvithuksema ja dat galgá leat doaimmas 2006:s. Háhkan dihte dieđuid das makkár váikkuhusat dan huksemis leat leamaš sámi diliide de galgá čađahuvvot máŋggafágalaš dutkanbargu mii kárte duohta váikkuhusaid sámi ealáhusaide, kultuvrii ja servodahkii. Dat galgá bargojuvvot go buvttadeapmi lea bistán muhtin jagiid. Maŋŋel dan barggu de áigot ovttas Sámedikkiin ja boazodoalloorganisašuvnnaiguin árvvoštallat doaimmaid mat sihkkarasttaše ahte buriid váikkuhusaid sáhttá geavahit, ja jus ležžet heajos váikkuhusat de galget dat unniduvvot.