- Lean hui ilus go beasan rámiin almmuhit ahte sámi álbmotbeaivi guovvamánu 6. beaivvi 2004 rájes galgá šaddat almmolaš levgenbeaivin Norggas. Mu sávaldat lea ahte levgen sámeálbmotbeaivvi miehtá Norgga, galgá čájehit ahte sámi kultuvra lea ealli ja nanus, cealká stáhtaministtar Kjell Magne Bondevik.

Sámi álbmotbeaivi ávvuduvvo Norggas, Ruoŧas, Suomas ja Ruoššas ja lea dehálaš symbolan dasa ahte sámi álbmot lea oktasaš álbmot rájiid rastá. Dán beaivvi ávvudit muitin dihte vuosttaš sámi oktasaščoahkkima guovvamánu 6. beaivvi 1917. Dát čoahkkin lea vuođđun miehtá riikkalaš ja našuvnnaid rasttideaddji sámi ovttasbargui mii lea ovdánan otná beaivvi rádjái.

Guovvamánu 6. beaivvi 2004 ávžžuhit stáhtalaš ásahusaid levget sámi leavggain ja norgga leavggain. - Oslos áigut mii Regjeringskvartálas levget maiddái sámi leavggain, nugo mii dagaimet dán jagi ge, cealká Bondevik.

Stáhtaministtar cealká ahte dát lea positiivvalaš ja addá árvvu sámi kultuvrra čalmmustahttimii ja lea mielde oidnosii buktimin dan.

- Lea dehálaš dahkat sámi kultuvrra dovddusin ja oažžut dan oidnosii. Mun sávašin ahte almmolaš levgen sámi álbmotbeaivvi galgá leat symbolan sámi kultuvrra, historjjá ja iešdovddu dohkkeheapmái, ja ávžžuhan buot almmolaš doaimmahusaid levget sámi leavggain dán beaivvi, loahpaha stáhtaministtar.

Mielddus:
- Rapport fra interdepartemental arbeidsgruppe, november 2003
- Diehtojuohkin almmolas ásahusaide mo sámi leavgga galgá geavahit