IMF ođđa norgga ekonomiija árvvoštallan

Riikkaidgaskasaš valuhttafoanda, IMF, ovddidii odne cealkámuša norgga ekonomiija ja ekonomiijapolitihka birra. – IMF cealkámuš lea mávssolaš Norgga digaštallamii ekonomiija ja politihka birra. Mun lean movtta go IMF doarju Ráđđehusa makroekonomiijapolitihka váldolinnjáid, ruhtadanministtar Sigbjørn Johnsen dadjala.

IMF áirrasgoddi loahppacealkámuš lea, ahte norgga ekonomiija birge bures vaikko riikkaidgaskasaš ekonomiija lea eahpestáđis. Buvttadeapmi lea badjeleappos go ovdal 2008 ruhtadanroasu, ja bargguhisvuohta lea vuollin. Áirrasgoddi navdá nannánekonomiija ovdánit muhtin veardde dás ovddos guvlui, ja dasa váikkuha eanaš sisriikka jearru. IMF deattuha cealkámušastis, ahte Norggas lea buoret vuođđu birget euroavádaga lassánan ráfehisvuođain, go máŋgga eará Eurohpá riikkas. Ekonomiija lea dattetge rašši, jos luohttámuš gillá ráfehisvuođaid geažil, jos oljohattit njidjet dahje jos báŋkosuorgi oažžu ruhtadanváttisvuođaid.

- Norga ii leat sirrejuvvon eará máilmmi dáhpáhusain. Min buoremus suodji lea doallat iežamet beavddi čorgadin. Mun oaivvildan nu movt IMF, ahte čavga ruhtadanpolitihkain mii suddjet iežamet gilvalannávccaid, ja diktit ruhtapolitihka leat vuosttaš linnjá bealuštussan, jos riikkaidgaskasaš dilli vearrána, Johnsen dadjala. 

IMF áirrasgoddi čujuha cealkámušastis riskii, mii laktása alla stohpohattiide ja norgga bearatgottiid alla vealgedássái. IMF čujuha dasa, ahte makrogaskaomiiguin seahtá geahpedit dakkár riskka, ja namuha earret eará Ruhtadangeahču njuolggadusaid, mat gusket visteloanaide, stuorát riskadeattu visteloanaid oktavuođas, ja báŋkkuid kapitála nannema dan láhkai, ahte ráddjet vuoittu váldima ja čavget bálkápolitihka. IMF rávve maiddái mo Norggas sáhttá láhčit makrogoziheami institutionála rámmaid.

- Lea mávssolaš nannet ruhtadanvuogádaga goziheami ollislažžan, go dainna juksat ruhtadansuorggi stáđisvuođa. Ruhtadandepartemeanta áigu formaliseret Norgga makrogoziheami 2012 vuosttaš jahkebeali, Johnsen dadjala.

IMF áirrasgoddi doarju vuogi, mainna Ráđđehus ovddida ruhtadanpolitihka 2012 stáhtabušeahtas. Áirrasgoddi lea árvvoštallamisttis deattuhan riikkaidgaskasaš riskagova, ja eaktudan makrogaskaomiid geavaheami. Áirrasgoddi lea maid vuohttán, ahte Norggas badjánit guhkes áigodaga hástalusat ruhtadanpolitihkas, go dearvvašvuođagolut, penšuvnnat ja bargonávccahisvuođaoadju lassánit. Dat čalmmustahttá, ahte oadjovuogádaga ferte ain ođasmahttit, ja dan láhkai doarjut bargoinsentiivvaid.

Áirrasgoddi áigu ođđa jagi bealde čállit viidásut raportta, maid digaštallet dasto IMF stivrras.

________________________

Preassakonferánssa sáhttá maid geahččat: Neahtta-TV-sáttan siiddus regjeringen.no

Norway 2011 article IV consultation: Concluding statement of the IMF mission