Norgga álbmotmehciid ođđa mearkagálvo- ja gulahallanstrategiija

-Álbmotmeahcit leat oassi min nationála árbbis, ja mun oaivvildan ahte daid galgat mii sáhttit geavahit dávjjibut. Ođđa strategiija galgá mielddisbuktet ahte eanet olbmot galledit min čáppa luondduguovlluid seammás go luondu suodjaluvvo, cealká Tine Sundtoft.

Norgga buoremus luondduguovllut gávdnojit álbmotmehciin. Riikkaidgaskasaččat lea doahpagis “Nationála meahcci” stuora mearkkašupmi. Dieinna doahpagiin galggašedje  min álbmotmeahcit šaddet mearkagálvun midjiide norgalaččaide ja olgoriikalaš mátkkošteddjiide. Jos mii galgat nagodit lasihit álbmotmehciid geavaheddjiid, de lea buorre profileren dehálaš.

Birasseasti mátkeealáhus

 

-Mii háliidat addit gielddaide buoret vejolašvuođaid lágidit birasseasti mátkeealáhusa, maiddái suodjalanguovlluin. Mii háliidat ahte eanebut – sihke norgalaš ja olgoriikalaš mátkkošteaddjit – geavahit álbmotmehciid. Áinnas sii geat eai mátkkoš nu ollu luonddus, dadjá Sundtoft.

Jagi 2014 celke olles 34 proseantta olgoriikalaš mátkkošteddjiin ahte sii ovdal  háliidit galledit  álbmotmehciid Norggas go eará. Mátkeealáhus lea ealáhus mii máilmmis stuorru jođánepmosit. Norga áigu das mielde. Luondu lea deháleamos ášši go Norggas háliida luomustallat.  Mii áigut láhčit dilálašvuođaid nu ahte meahcit suodjaluvvojit ja nu ahte turisttat ožžot luondduvásáhusaid.

Suodjaleapmi addá vuođu buriid luondduvásáhusaide

  

Sullii 17 proseantta min luonddus lea suodjaluvvon. Dáid luondduguovlluid galgat mii ja boahttevaš buolvvat sáhttit geavahit.

-Vásttolaš geavahus ii vuosttal suodjaleami. Baicce lea nuppe láhkai.  Buolvaperspektiivvas buvttiha buorre suodjaleapmi buriid luondduvásáhusaid, lohká Sundtoft.

Álbmotmeahcit leat min iežamet álbmogii dehálaš mátkkoštanbáikkit. Mii háliidat lasihit álbmotmehciid geavaheddjiid, ja aktiiva olbmuid. Jos oažžut eanet olbmuid válljet aktiiva luondduluomustallama iežamet riikkas, de dat váikkuha positiivvalaččat sihke dálkkádatluoitimiidda ja álbmotdearvvašvuhtii.  

Mii lea ođas? 

• Ođđa visuála profiila ja ođđa ollislaš identitehta – mii dovddusin dahká álbmotmehciid ja ahte dat šaddet geavahan láhkai, mii fas buorida báikkálaš árvoráhkadeami.   Visuála profiila lea ráhkaduvvon Snøhetta Design:n ovttas.
• Álbmotmehciid ođđa galledanstrategiija ovddiduvvo gos mii cealkit: “Buresboahtin sisa. Návddaš čáppa luonddu” ovdal go “FUOMÁŠ! Suodjaluvvon guovlu. Dáppe lea ollu mii lea lobiheapme”.

Dieđut álbmotmehciid birra:          

• Norggas leat 44 álbmotmeahci, 7 Svalbárddas ja 37 nannámis
• Álbmotmeahcit leat duoddariin, mearragáttiin ja mearas
• Sullii 10 proseantta Nannán-Norggas lea suodjaluvvon álbmotmeahccin
• 85 norgga gielddain leat guovllut mat leat suodjaluvvon álbmotmeahccin
• Álbmotmeahcit galget geavahuvvot meahcástallan oktavuođas, ja eará doaimmaid oktavuođas mat eai billis suodjalanárvvu.  Omd. sáhttá vázzit, guolástit ja bivdit doppe.