Smávvaguliid čiehkádansajit suodjaluvvojit

-Bánnaággarasšaddu doaibmá áibmobuhtisteaddjin mearas. Dat fuomáša nuoskkidemiid ja nuppástuhttá daid dearvvas ja ruoná šaddoávnnasin. Nuoskkidemiid čorgen máksá ollu miljovnnaid. Bánnaággarasšaddu buhtista čázi nuvttá, cealká dálkkádat- ja birasministtar Tine Sundtoft.   

Čiehkádansadji ja bárrodoaddji

Bánnaággarasšaddu ii leat rássešaddu, nu mo namma muitala, muhto smávva lieđđešaddu mii eallá mearas. Ággarasšaddobearrašii gullet bánnaággarasšaddu, siekka ággarasšaddu ja dábálaš ággarasšaddu, ja dat šaddadit gittiid mearrabodnái. Dat leat dehálaš ealádat reahkaide, gazzareabbáide, skálžžuide ja smávvaguliide ja riddodorskiide.

-Ággarasšaddoguovllut leat vuogas čiehkádansajit smávvaguliide ja mearraelliide. Sis lea de buoret vejolašvuođat eallit go sáhttet čiehkádit stuorra guliin. Bánnaággarasšaddu váikkuha maid dasa ahte šaddá ealas mearragáddi ja doaibmá čáhcevuoleoásan.  Sihke guolit ja olbmot besset illudit dan geažil, dadjá guolástusministtar Elisabeth Aspaker.

Ággarasšaddoguovllut doibmet maid bárrodoaddjin ja gáttit eai ge guorbba nu johtilit. Boahtteáiggi dálkkádatrievdademiid ja garradálkkiid geažil dat šaddá ain deháleappot, ja ággarasšaddoguovllut sáhttet mielddisbuktit uhcit billistemiid. 

Vuoruheapmi váikkuha

Ággarasšattuid vuoruheapmi mearkkaša ahte šaddu suodjaluvvo, ja buohkat fertejit dan doahttalit go oidnet dáid šattuid.

-Bánnaággarasšaddu mii šaddá norgga riddoguovlluin lea sakka áitojuvvon. Erenoamáš suodjaleapmi buktá šaddui buoret ovdánanvejolašvuođaid. Vásáhusat dán rádjai čájehit ahte suodjaleapmi mearkkaša ahte eanet olbmot fuomášit šaddošlája, ja ahte sii vuhtiiváldet šattu go čađahit doaimmaideaset, dadjá Sundtoft.

Bánnaággarasšaddu áitojuvvo huksemiid, bodnerivohiid čorgendoaimmaid ja deavdimiid geažil. Dat lea dušše 13 dovddus guovllu gos dát šaddu lunddolaččat eallá, ja dat gávdno Oslovuonas, Rogalánddas ja Sunnhordalánddas. 

Dieđut – Suodjaluvvon šlájat

• Luonddušláddjivuođaláhka rahpá láhkaásahusa bokte vejolašvuođa suodjalit áitojuvvon šlájaid go ožžot stáhtusa vuoruhuvvon šládjan
• Muhtun šlájaide mat ellet nannámis mearriduvvojit šaddoguovllut, nu gohčoduvvon ekologalaš šaddoguovllut
• Buot suodjaluvvon šlájaid várás ráhkaduvvo doaibmaplána
• 10 šlája leat ožžon suodjalanstáhtusa. Bánnaággarasšattu lassin leat:
• Njiččehasat: Njálla
• Lottit: Giljobaš ja čáhpesbađošguškil. Suodjaleapmi ii gusto čáhppesbađošguškila fuolkái mii eallá Jærenis
• Šattut: Guottánlieđđi, honnetlieđđi ja rukses vuovdeeamit
• Divrrit: Johkasaddobivdi (Elvesandjeger), oktoealli (eremitt) ja klippeblåvinge 

Bánnaággarasšattu suodjaluvvo (Birasdirektoráhtta)

Bánnaággarasšattu doaibmaplána (DN-raporta 1-2010)