Norgga skiipajohtolaga ruoná ođasmahttin
Historjjálaš arkiiva
Almmustahttináigodat Solberga ráđđehus
Almmustahtti: Dálkkádat- ja birasdepartemeanta
Ođas | Almmustahtton: 11.05.2016
Ráđđehus árvala reviderejuvvon nationálabušeahtas juolludit 65 miljovnna kruvnnu movttiidahttit plánet ja hukset dálkkádat- ja birasseasti skiippaid ja fearggaid.
Foto: Istock.
-Ruđat galget vuoruhuvvot maritiibma ealáhussii, nugo skiipagoasttideddjiide, skiippalágideddjiide ja dávvirlágideddjiide. Ruđat galget veahkehit ásahit luoitogeahpedeaddji- ja nollaluoitoteknologiija fearggain ja eará ruvttofievrrádusain maid fylkkagielddat ja gielddat hálddašit. Dat geahpedivčče CO2-luoitimiid ja báikkálaš áibmonuoskkideami, cealká dálkkádat- ja birasministtar Vidar Helgesen.
Dáinna árvalusain mii čuovvolat ráđđehusa dálkkádatpolitihka ahte vuoruhit birasseasti skiipajohtolaga. Dasto lea dat oassin ruoná gilvalannávccaid ovddidanbarggus.
-Mii háliidat ođđa vugiiguin čađahit ruoná ođasmahttima skiipajohtolahkii. Mii dahkat vejolažžan plánet ja hukset ruoná skiippaid ja fearggaid. Dat addá barggolašvuođa riddoguovlluin ja nanne norgga maritiibma ealáhusa gilvonávccaid, dadjá Vidar Helgesen.
Ruoná teknologiijaovdáneapmi
Lagamus jagiid galget 60 fylkkagielddalaš feargaoktavuođa (75 feargga) ja sullii logi riikafeargaoktavuođa almmuhuvvot.
Hordalándda fylkkagielda almmuhii aiddobáliid 17 feargaoktavuođa masa gullet 20 feargga. Eará riddofylkkat besset vuoruid mielde dahkat dan seamma. Ruoná riddu ja riddomátkeealáhus galgá maid ovddiduvvot.
-Luoitogeahpedeaddji- ja nollaluoitoteknologiija addá vejolašvuođaid sisriikka fearggaide ja eará fatnasiidda ovttasbargat norgga skiipahuksenfitnodagaiguin unnidan dihte goluid luoitogeahpedeaddji- ja nollaluoitočovdosiin, dadjá ealáhusministtar Monica Mæland.
Fylkkagielddalaš feargaoktavuođat ruhtaduvvojit dálá váikkuhangaskaoapmeapparáhta bokte, nugo Enova. Sii juolludit Hordalándda fylkkagildii 273 miljovnna kruvnnu gáddeelrávdnjerusttegii maid dárbbašit feargaoktavuođaid geažil.