Gumpebivdu

- Mun lean odne mearridan dahkat liseansabivddu vejolažžan guovtti gumpečorragii maid reviira vuosttažettiin lea olggobealde gumpeavádaga. Dasa lassin lea ođđa mearrádus liseansabivddu birra gumppiin olggobealde gumpeavádaga Hedmárkkus ja Akershusas, mii njulge daid váilevašvuođaid maidda Oslo diggegoddi lea čujuhan, dadjá dálkkádat- ja birasgáhttenministtar Vidar Helgesen.   

Addá vejolašvuođa liseansabivddu vuođul báhčit guokte gumpečorraga

Liseansabivddu vuođul dahkko vejolažžan báhčit guokte gumpečorraga Julussa- ja Osdalsreviirras, goappašat reviirrat leat olggobealde gumpeavádaga Hedmárkkus, ođđajagimánu 1.b. 2018 rájes. Dát lea heivehuvvon hálddašeami prinsihpa mielde mii galgá sihkkarastit čielga avádagaid gos biebmoeallit vuoruhuvvojit ja avádagaid gos gumppet vuoruhuvvojit. Dáin reviirrain sáhttá báhčit 16 gumppe. Dát mearrádus dahká vejolažžan liseansabivddu vuođul báhčit oktiibuot 42 gumppe Norggas dán dálvvi.

- Mun lean bidjan olu deattu daidda láidestagaide maid Stuoradiggi giđđat bijai ja geográfalaččat heivehuvvon hálddašeami prinsihppii. Dat ahte galget leat unnán gumppet olggobealde gumpeavádagain lea árvvoštallon almmolaš beroštupmin maid galgá deattuhit, dadjá Helgesen.

Boranávdelávdegottit dahke iežaset mearrádusain vejolažžan báhčit Slettåsčorraga, mii lea rádjereviira Ruoŧa guvlui ja gos norgga oassi dan reviirras lea ollásit siskkobealde gumpeavádaga. Departemeanta rievdada dán oasi lávdegottiid mearrádusas ja gieldá Slettåsčorraga báhčima.

- Dat ákkat mat dorjjoše Slettåsčorraga báhčima eai leat nu nannosat ahte addet vuođu dakkár bivdui. Stuoradikkis lea čielga eaktu ahte avádagaid siskkobealde galgá lassá bivdui leat allat. 

Departemeanta lea maid ožžon áigeguovdilastojuvvon fágalaš neavvagiid Birasdirektoráhtas mii earret eará buktá árvvoštallama das ahte olahit go mii nállemihtu boahtte jagi ja árvvoštallama das ahte áitá go bivdu náliid seailluheami.

Ođđa mearrádus olggobealde gumpeavádaga

Oslo diggegoddi bissehii skábmamánu 21.beaivvi liseansabivddu 12 gumppe olggobealde gumpeavádaga guovlluin 4 ja 5. Dálkkádat- ja birasdepartemeanta lea dál dahkan ođđa mearrádusa seamma eriin dán áššis, mii njulge daid boasttuvuođaid maidda diggegoddi lea čujuhan álgomearrádusas.

- Ođđa mearrádusa vuođđu dan 12 gumppe liseansabáhčima birra olggobealde gumpeavádaga guovlluin 4 ja 5 lea govda čielggadeapmi ja eavttu árvvoštallan das ahte bivdu ii galgga áitit náli vejolašvuođa seailut. Diggegoddi oaivvildii ahte dán eavttu árvvoštallan ii lean dohkálaš álgomearrádusas, dadjá Helgesen.

Ovdal dán ođđa mearrádusa lea departemeanta, buori hálddašanvieru mielde, bivdán oaiviliid sis geat váide álgomearrádusa. Eai leat boahtán ođđa dieđut mat leat rievdadan min oainnu dan áššis.

Vahátbáhčin

Boranávdelávdegottit guovlluin 4 ja 5 leat maid mearridan vahátbáhčineari gumppiin. Mearrádus váidojuvvui departementii, mii lea doalahan lávdegottiid mearrádusaid.

- Gumppet mat vejolaččat báhččojuvvojit vahátbáhčinearis gessojuvvojit liseansabáhčinearis ja nuppeguvlui. Dát mearrádus dalle ii mielddisbuvtte ahte eanet gumppet sáhttet báhččojuvvot. Mun oaivvildan ahte lea dárbu čáhkkehit saji vahátbáhčimii jus gumpe ovdamearkka dihte daguha stuora vahágiid bohccuide dálvvi mielde, dadjá Helgesen.

Departemeanta lea maid mearridan Birasdirektoráhta biehttaleami váidagiid Slettåsreviirra gumppiid vahátbáhčima dáfus, ja lea doalahan direktoráhta mearrádusa. Ii leat boahtán ovdan ahte dát gumppet leat sierra ládje várran olbmuide go eará skandinávalaš gumppet.