Vuoiŋŋašnjoammudávdda hehtten

-Mis lea hui gáibideaddji hástalus vuoiŋŋašnjoammudávddain, mii lea jámolaš elliiddávda, man leat fuobmán Nordfjella goddenális. Dán dilis mii dahkat buot maid sáhttit dávdda hehttet leavvamis eará goddeguovlluide dahje eará ruksesgoddešlájaide, dadjá dálkkádat- ja birasministtar Vidar Helgesen.

Jus mii eat nagot birget dáinna dávddain, de dat sáhttá dagahit duođalaš váikkuhusaid min luondduresurssaid ávkkástallamii. Dávdda leavvan bohccuide sáhttá buktit stuora ekonomalaš váikkuhusaid boazodolliide. Dat maiddái sáhttá ollu gáržžidit sihke bohccobierggu sisriikkalaš vuovdima ja olgoriikii vuovdima.

Biebmobearráigeahčču ja Šibitdoavttirinstituhtta leat gávnnahan ahte buoremus vuohki birget dávddain mii gohčoduvvo Chronic Wasting Disease – CWD, lea heakkahuhttit goddenáli masa dát dávda dál lea njommon. Dát guoská goddenállái Nordfjellet goddeguovllus, sona 1, mii lea Sogn ja Fjordanes ja Buskerudas.

Heakkahuhttin galgá dahkkot miessemánu 1.b.2018 rádjái. Oktiibuot galget báhččot 2.000-2.500 bohcco oanehis áiggis. Dávdda mihtilmasvuođa geažil ferte hui várrogasat giehtaguššat njuvvojuvvon gottiid ja njuovvanbázahusaid, ja dat lea resursagáibideaddji. Jápmán gottiin váldojit iskosat vai eanet máhtu oažžu dávdda leavvamis. Stáhta luonddubearráigeahčus lea dehálaš doaibma organiseret ja čađahit báhčimiid.

-Mii ráhkadit bienalaš plána vai fas boađáše gottit dohko dan guvlui mii dál sanerejuvvo. Mii sávvat ahte muhtun jagiid geahčen lea dearvvaš ja dearvvašlaš goddenálli Nordfjellas fas, dadjá Helgesen.