Báikenammalága rievdadusárvalus: Eanaeaiggát oažžu vuoigatvuođa mearridit movt su eanaopmodaga nama galgá čállit

Leaŋka báikenammalága rievdadusárvalussii  (ođđa dárogillii)

Kártadoaimmahat galgá ain doaibmat almmolaš mearridanorgánan dállonammaáššiin, muhto jos eanaeaiggát sáhttá duođaštit ahte čállinvuohki maid son háliida iežas dállui dahje eanaopmodahkii, lea geavahuvvon dállonamman, de galgá son beassat mearridit čállinvuogi. Almmolaš eiseválddit fertejit vuhtiiváldit čállinvuogi maid eanaeaiggát mearrida, muhto dat ii  galgga njuolggadeaddjin eará báikenamaid čállinvuohkái. 

-Árvalus mearkkaša ahte eanaeaiggát beassá mearridit čállinvuogi mii ii čuovo norgga riektačállinprinsihpaid. Gustojeaddji lága mielde dat ii leat leamaš ovdal vejolaš, muhto čuovvu priváhta eanaopmodaga hálddašanvuoigatvuođa, cealká kulturministtar Thorhild Widvey. 

Láhkaárvalus čuovvola Stuoradikki ovddastusevttohusa maid stuoradiggeáirasat Øyvind Halleraker ja Olemic Thommessen (Olgeš) ovddideigga 2008.

Ulbmilparagráfa rievdaduvvo maiddái, vai boahtá čielgaseappot ovdan ahte báikenamat leat gielalaš kulturmuittut maid ferte gáhttet. Kulturdepartemeanta maid árvala gielalaš rievdadusaid eará paragráfain. Váidinnjuolggadusain lea aiddostahttojuvvon ahte báikenammalága vuođul sáhttá váidit jos gielda sihku boares ja árbevirolaš báikenamaid. Báikkálaš nammaárvvuid berre čuovvut, jos vel ii sáhte ge buot árbevirolaš namaid geavahit eanadagaid nuppástuhttimiid geažil.