Dáiddárviessu Svalbárdii

Dáidda ja dáiddárviesu vuoruheapmi bidjá Svalbárdda ja Norgga internationála dáiddakártii. Dáiddárat sihke Norggas ja muđui máilmmis sáhttet boahtit deike muhtun áigái, ássat dáppe, oažžut ođđa movtta ja ráhkadit dáidagiid. Dat dahká dáiddafágalaš lonohallama vejolažžan sihke dán guovllus ja riikkaidgaskasaččat. Dát lea oassi min ulbmillaš davviguovlopolitihkas, ja njuolga čuovvoleapmi Svalbard-dieđáhussii mii ovddiduvvui miessemánus dán jagi, cealká kulturministtar Linda Hofstad Helleland.

Dáiddárviessu lea namuhuvvon stuoradiggedieđáhusas Svalbárdda birra (Dieđ. St. 32 (2015-2016): Ráđđehus áigu láhčit dili dasa ahte Davvinorgga dáiddamusea árvvoštallagoahtá vejolašvuođaid hukset dáiddárviesu/guosseateliera gos lea vejolaš dáiddáriid váldit vuostá.   

- OCA:ii lea stuora gudni ja illu doaibmat ovttasbargoguoibmin dán prošeavttas. Dat heive bures min guoktejagi prográmmii “Thinking at the Edge of the World. Perpectives from the North”, mas mii árjjálaččat ovttasbargat riikkaidgaskasaš dáiddáriiguin, kuráhtoriiguin ja earáiguin ahte lágidit mátkkiid, logaldallamiid, čájáhusaid ja dáiddárdeaivvademiid. Prošeavtta almmuheapmi dáhpáhuvvá vuosttas konfereanssa oktavuođas Svalbárddas maid mii lágidat ovttas Davvinorgga dáiddamuseain, ja mii leat hui ilus go dát guovlu dalle oažžu ollu fuomášumi internationála dásis. Mii áigut resideansaprográmma bokte láhčit dili dáiddáriid ja báikegottiid ovttasbargui sihke Norggas ja olgoriikkas, dadjá OCA direktevra Katya García-Antón.

- Davvinorgga Dáiddamusea ásahii Kunsthall Svalbard Longyearbyenii guovvamánus 2015. Mii leat maid čađahan vuosttas lágideami guovddážis, mii loahpahuvvo Olav Christopher Jenssen čájáhusain: The Expedition. Mii illudat ovttasbargat ollu berošteddjiiguin ásahit bistevaš dáiddárviesu ja bargobáji Svalbárdii. Nu sáhttit joatkit iežamet doaimmaid doppe, gos dáidda geavahuvvo ovdánahttit Svalbárdda boahtteáiggi, loahpaha Davvinorgga Dáiddamusea direktevra  Jérémie Michael McGowan.