Stáhtabušeahtta:
Eanet ruhtadangáldut norgga dáidagii ja kultuvrii
Historjjálaš arkiiva
Almmustahttináigodat Solberga ráđđehus
Almmustahtti: Kulturdepartemeanta
Preassadieđáhus | Nr: 88/16 | Almmustahtton: 06.10.2016 | Maŋimuš ođasmahttojuvvon: 14.10.2016
Ráđđehus joatká barggu láhčit dili eanet ruhtadangálduide kultursuorggis. Ulbmil lea sihke nannet kultursuorggi ja nannet ekonomalaš dili. Ráđđehus evttoha 5 miljovnna kruvdnasaš lassáneami Talent Norge AS:i, nannet skeaŋkanannenortnega badjelaš 6 miljovnnain kruvnnain ja 2,5 miljovnna kruvdnasaš doarjja dáidda- ja kulturvuoruheapmái Svalbárddas.
- Ráđđehus háliida ain buori almmolaš ruhtadeami kultursuorggis. Seammás mii háliidat ahte eambbosat galget searvat doarjut buriid dáidda- ja kulturprošeavttaid miehtá Norgga. Danne mii háliidat dán jagi bidjat vel eanet ruđa priváhta skeaŋkkaid lassin. Go kulturaktevrrat leat čeahpit gávdnat priváhta skeŋkejeddjiid, de mearkkaša dat eanet ruđa obalohkái kultursuorgái, dadjá kulturministtar Linda Hofstad Helleland.
Talent Norge
Talent Norge AS evttohuvvo nannejuvvot 5 miljovnnain kruvnnain 2017:s. Álggahanjagis 2015:s searvvai Talent Norge AS 11 taleantavuoruheapmái 27 miljovnnain kruvnnain. Sii ožžo mielde 16 priváhta aktevrra ja 52 miljovnna kruvnna. Ráđđehus háliida leat mielde nannenmin Talent Norga stuorrunvejolašvuođaid, sihke sin taleantaovddidemiin ja kultursuorggi govddit ruhtademiin.
Dasa lassin oažžu Talent Norge 5 miljovnna kruvnna dánjagáš speallanruđain Talent Norge Junior Program-pilohttaprošektii. Prošeakta áigu nannet synergiijaid gaskal Talent Norge alimus vuoruhemiid ja ođđa juniortaleanttaid nu ahte šaddá ollislaš johtu nuorra agis gitta karrieraálgui. Oppalaš juolludeapmi Talent Norgii 2017:s šaddá danne 36,1 miljovnna kruvnna stáhtabušeahta bokte ja 5 milj. kruvnna speallanruđain.
- Talent Norge deavdá dárbbu kultursuorggis. Dárbbašuvvo lassi áŋgiruššan loktet erenoamáš čeahpes dáiddáriid ja olbmuid. Priváhta addit ožžot sihkkarvuođa go Talent Norge árvvoštallá prošeavttaid fágalaččat buorren. Dát dagaha ahte priváhta aktevrrat addet stuorát supmiid, dadjá kulturministtar Linda Hofstad Helleland.
Talent Norge AS ásahuvvui 2015 ođđajagimánus stáhta Kulturdepartemeantta bokte, ja Sparebankstiftelsen DNB ja Cultiva leat eaiggádat.
Skeaŋkanannen
Ráđđehus háliida nannet skeaŋkanannenortnega vel 6 miljovnnain kruvnnain oktiibuot 51 miljovnna kruvdnii 2017:s. Dássážii dán jagi lea ortnet ožžon badjel 100 ohcamuša smávva ja stuorra aktevrrain olles kultursuorggis. 2017:s sáhttá vuoruheapmi addit kultursuorgái 255 miljovnna kruvnna priváhta skeaŋkan ja skeaŋkanannendoarjjan.
- Skeaŋkanannenortnet doaibmá ja lea addán norgga kultursuorgái buoret ekonomalaš dili. Máhcahemiid maid oažžut suorggis, lea ahte ortnet lea mielde duohtandahkamin prošeavttaid, dadjá kulturministtar Linda Hofstad Helleland.
Skeaŋkanannendoarjja ásahuvvui museaid várás 2014:s. Ulbmil lei movttiidahttit kulturásahusaid eanet priváhta ruhtadit. 2016:s ortnet viiddiduvvui fátmmastit skeaŋkkaid musihkkii, girjjálašvuhtii, lávdedáidagii, visuála dáidagii ja kulturvisttiide.
Dáidda- ja kulturvuoruheapmi Svalbárddas
Ráđđehus ásaha ovttas priváhta aktevrraiguin vuođđudusa mii galgá láhčit dili dáidda- ja kulturdoibmii Svalbárddas.
- Ráđđehus háliida nannet kultuvra- ja dáiddaealáhusaid Svalbárddas ja lasihit beroštumi Svalbárdii destinašuvdnan. Ođđa vuođđudusas galgá leat riikkaidgaskasaš ja árktalaš jurddašanvuohki, dadjá kulturministtar Linda Hofstad Helleland.
Dáiddavuoruheapmi Svalbárddas lea oassin aktiivvalaš davviguovlopolitihkas ja Svalbárdadieđáhusa njuolgga čuovvoleapmi.
- Dát dáiddavuoruheapmi sáhttá bidjat Svalbárdda ja Norgga riikkaidgaskasaš dáiddakártii. Lea stuorra riikkaidgaskasaš beroštupmi Svalbárdii ja davviguovlluide. Sávan ahte Svalbárdda erenoamáš luondu ja imašlaš čuovga movttiidahttá dáiddáriid miehtá máilmmi hábmet ja gaskkustit iežaset bargguid, dadjá kulturministtar Linda Hofstad Helleland.