2021 stáhtabušeahtta:
2250 miljovnna kruvnno kultuvrra, eaktodáhtolaš doaimmaid ja valáštallama movttiidahttinortnegiidda
Historjjálaš arkiiva
Almmustahttináigodat Solberga ráđđehus
Almmustahtti: Kulturdepartemeanta
Preassadieđáhus | Nr: 109/20 | Almmustahtton: 07.10.2020 | Maŋimuš ođasmahttojuvvon: 09.10.2020
Ráđđehusa ulbmil lea ovddidit kultureallima, eaktodáhtolaš doaimmaid ja valáštallama nu ahte dat cevzet dálá roasuid čađa. Ráđđehus árvala danin juolludit 2250 miljovnna kruvnno kultuvrra, eaktodáhtolaš doaimmaid ja valáštallama movttiidahttimii covid-19-njoammuma oktavuođas.
– Covid-19-pandemiija lea čuohcan garrasit kultursuorgái. Ráđđehus háliida danin movttiidahttit doaimmaide, mat fátmmastit nu ollugiid go vejolaš. Dáinna juolludemiin mii geahpedit eahpesihkarvuođa nu ahte besset lágidit doaimmaid. Mii fertet doalahit kultuvrra, eaktodáhtolaš doaimmaid ja valáštallandoaimmaid jođus, dadjá kultur- ja dásseárvoministtar Abid Q. Raja.
1185 miljovnna kruvnno juolluduvvojit eaktodáhtolaš doaimmaide ja valáštallamii, 1065 miljovnna kruvnno fas kultuvrii. Juolludeapmi guoská vuosttaš jahkebeallái 2021.
Kultursuorggi movttiidahttinortnet galgá ovddidit kulturfálaldagaid miehtá riikka. Ortnegiin jotket movttiidahttinortnega, mii ásahuvvui golggotmánu 1. beaivve. Dainna ovddidit doaimmaid ja nannejit dábálaš mekanismmaid vai transakšuvnnat ealáhusgollosiin besset fas johtui. Ortnega ulbmilin lea ovddidit ollu doaimmaid Norgga kultureallimis, maiddái roasu maŋŋá.
– Njoammuneastadandoaimmat pandemiija oktavuođas sáhttet čuohcat sakka kultur-, eaktodáhtolaš- ja valáštallansuorgái. Dáid doaimmaid fertejedje ovddemustá bissehit ja šluhttet, ja dáidet maid leat maŋimusat, mat sáhttet doaibmagoahtit dábálaš láhkai, muitala kultur- ja dásseárvoministtar.
Norgga kulturráđđi hálddaša kultursuorggi movttiidahttinortnega. Lotteriija- ja vuođđudusgeahčču hálddaša eaktodáhtolaš- ja valáštallandoaimmaid ortnega.