Kulturbušeahtain ovddidit doaimmaid ja máŋggabealatvuođa

– Kulturbušeahta bokte ráđđehus fuolaha nannosit, ahte sáhttit lasihit doaimmaid, fátmmastit eanebuid ja ovddidit nana ekonomiija olles riikkas. Buohkat galget beassat searvat, sihke bargoeallimii, kulturdoaimmaide, valáštallamii ja servodaga eará osiide. Dál mii áŋgiruššat nannosit máŋggabealatvuođa ovdii, dadjá kultur- ja dásseárvoministtar Abid Raja.

Doarjjaortnegiin nannet doaimmaid covid-19 oktavuođas

Ráđđehus árvala juolludit oktiibuot 2 550 miljovnna kruvnno kulturdoaimmaide, eaktodáhtolaš doaimmaide ja valáštallamii pandemiija geažil.

2 250 miljovnna kruvnno juolluduvvo ortnegiidda, maid áigumuššan lea ovddidit ja lágidit doaimmaid, mat leat heivehuvvon njoammuneastadandillái.

Dasto ráđđehus árvala maid juolludit 200 miljovnna kruvnno almmolaš ruđain ruhtaduvvon kulturásahusaide, mat báhcet movttiidahttinortnegiid olggobeallái. 140 miljovnna kruvnno juolluduvvo musihkka- ja lávdedáiddaásahusaide ja 60 miljovnna museaide.

Dasa lassin leat árvalan nannet Stáhta dáiddárstipeandda 100 miljovnnain kruvnnuin gaskaboddasaš stipeandan, vai doalahit dáiddáriid buvttadeami jotkkolažžan. Ortnet gusto vuosttaš jahkebeallái 2021, go ii leat sihkar mo njoammudávda ovdána.

Nana áŋgiruššan máŋggabealatvuođa beales

Ráđđehus háliida lasihit máŋggabealatvuođa oassálastiid ja valáštalliid dáfus, ja dasa lassin ovddidit kulturovdanbuktimiid ja -fálaldagaid girjáivuođa. Dáidda ja kulturdoaimmat, valáštallan ja eaktodáhtolaš doaimmat galget speadjalastit servodaga girjáivuođa. Dat lea kulturpolitihka váldoáŋgiruššan iešguđet surggiin, ja ovddiduvvo earret eará dáid vuoruhumiid olis, mat leat mielde ráđđehusa 2021 kulturbušeahtas:

 

• 30 miljovnnain kruvnnuin jotket ja nannejit dáidda- ja kultursuorggi barggu máŋggabealatvuođa, searvadahttima ja dásseárvvu ovdii dan bokte ahte dorjot ásahusaid ja aktevrraid, mat leat ohcan doarjaga máŋggabealatvuođabargui.
• 119 miljovnna kruvnno lassidoarjjan lasseárvodivada buhtadusortnegii eaktodáhtolaš servviide, nu ahte ollislaš rámma 2021 lea 1,8 miljárdda kruvnno.
• 104 miljovnna kruvnno lassidoarjjan lasseárvodivada buhtadusortnegii, mainna huksejit valáštallanrusttegiid, ollislaš rámma lea 299 miljovnna kruvnno.
• 15,7 miljovnna kruvnno lassijuolludeapmin mánáid- ja nuoraidkultuvrii, mii gullá ráđđehusa bargui ođđa mánáid- ja nuoraidkulturdieđáhusain.
• 29 miljovnnain kruvnnuin nannejit taleanttaidovddideami, ja das geavahit 15 miljovnna kruvnno filbmasuorggi taleanttaid ovddideapmái ja njeallje miljovnna junioráŋgiruššamii.
• 11 miljovnnain kruvnnuin nannejit ámmátdánsuma infrastruktuvrra ja loktejit dánsuma dáiddahápmin.
• 11,5 miljovnna lasi gielaide, ja 2020 giellaáŋgiruššan joatkašuvvá 9,3 miljovnnain kruvnnuin, nu ahte ollislaš giellaáŋgiruššan lea 20,8 miljovnna kruvnno.
• 5 miljovnna kruvnno lasi kultur- ja kreatiiva ealáhusaid fitnodagaid mentorbálvalusaide.
• 5 miljovnnain kruvnnuin nannejit áŋgiruššama dihtorspealuid ovdii.
• 67 miljovnnain kruvnnuin servet EU kultuvrra ja audiovisuála suorggi prográmmii, Kreativ Europa, áigodagas 2021-2027.
• 16 miljovnnain kruvnnuin servet EU prográmmii vuoigatvuođaid, dásseárvvu ja vealaheami vuostá, CERV, áigodagas 2021-2027.
• 8 miljovnna kruvnno ođđa doarjjaortnegii rasismma, vealaheami ja vaššiságaid vuostá.
• 2 miljovnna kruvnno lassidoarjja lhbtiq-organisašuvnnaide.
• 5 miljovnna kruvnno lassidoarjja TryggEst-prošektii.
• 10 miljovnna kruvnno lassidoarjja Den Nationale Scene prošekteremii ja geahččalanlanjaid ja divohagaid geavaheapmái.
• 9,5 miljovnna kruvnno Ole Bulla dálu bajásdollui Lysøenis.
• 106 miljovnna kruvnno vai stáhta sáhttá searvat Finnskogens hus ođđa huksemii Grues.
• 26 miljovnna kruvnno vai stáhta sáhttá searvat Norsk Bergverksmuseuma prošektii Jakten på Sølvet.

– 2021 váldun lea movttiidahttit lágidit kultur-, eaktodáhtolaš ja valáštallandoaimmaid gustovaš njoammuneastadannjuolggadusaid mielde. Lea mávssolaš, ahte kulturpolitihkas láhčet dili dasa ahte dáidda- ja kulturdoaimmat, valáštallan ja eaktodáhtolaš doaimmat speadjalastet dálá servodaga máŋggabealatvuođa. Ráđđehusa doarjjaortnegat galget váikkuhit dasa ahte olbmot besset joatkit barggus, seammás go mii hukset gelbbolašvuođa ja fátmmastit eanebuid doaimmaide, dadjá kultur- ja dásseárvoministtar.