Almmuhit ahte bohtet ođđa, čavgadut njuolggadusat guolástanrihkolašvuođa vuostá

Ealáhus- ja guolástusdepartemeanta lea odne nannen ođđa láhkaásahusa, mii guoská guliid gáddái buktima raporteremii. –Dat mielddisbuktá ahte nagodit buorebut gozihit doaimmaid ja eastadit láhkarihkkumiid, guolástanministtar Elisabeth Aspaker dadjala.

-Maŋimuš áiggiid leat ollugat čalmmustahttán lobihisvuođaid guliid gáddái buktima oktavuođas. Dan vuođul oaidnit ahte dárbbašuvvojit beaktilis doaimmat, maiguin eastadit guollerihkolašvuođa, guolástanministtar deattasta.

Ođđa láhkaásahus gustogoahtá ođđajagemánu 1. b. 2015, nuba lea fitnodagain áigi nuppástuhttit doaimmaideaset dan ektui. Guolástandirektoráhtta sáhttá maid gaskaboddasaččat suovvat spiehkastit ođđa gáibádusain eanemusat guokte jagi, jos lea dárbu.

Dá leat mávssoleamos rievdadusat:

• Dieđihangeatnegasvuohta viiddiduvvo, earret earát čavgadut gáibádus registreret gálvvuid jođu guollevuostáiváldima siskkobealde.
• Deaddo- ja vihkkengáibádusaid viiddidit. Leat stuorát gáibádusat dan ektui, ahte vihkkenbohtosiid galget oaidnit ja dan ektui mo veakta lea biddjojuvvon, nu ahte sihke guolásteaddji ja geahččobargit galget sáhttit čuovvut vihkkema.
• Vuostáiváldi galgá dalán juohke vuostáiváldima maŋŋá, mas leat váldán vuostá guliid, mat fievrreduvvojit rusttegis viidáseappot, čállit dieđuid fievrrideami, šlája, buvttadandiliid, sturrodatčohkiidusa ja hivvodaga birra.

 
- Ođđa láhkaásahus sihkkarastá, ahte sállaša hivvodat registrerejuvvo riekta, ja fuolaha ahte mii oažžut eanet geahččočuoggáid dobbelabbos árvoviđjjis, Aspaker cealká.

Njuolggadusat galget leat álkibut olámuttos, ja danin ráđđehus lea čohkken buot njuolggadusaid, mat gusket guliid gáddái buktimii ja vuovdimii, ođđa láhkaásahussii, mii guoská guliid gáddái buktima raporteremii. Dat mielddisbuktá, ahte fámuhuhttet sihke ođđajagemánu 22. b. 2003 láhkaásahusa dieđihangeatnegasvuođa birra guliid gáddái buktima ja vuovdima oktavuođas ja skábmamánu 13. b. 1995 láhkaásahusa, mii guoská sállaša vuostáiváldiid ja vuvdiid dieđáhussii ja dieđihangeatnegasvuhtii.

Guolástanministaris lei gieskat čoahkkin ealáhusain guolástanrihkolašvuođa birra, ja dan čuovvuleapmin Ealáhus- ja guolástandepartemeanta lea maid bivdán Guolástandirektoráhta álggahit gulaskuddanproseassa, man olis árvvoštallat mo ollašuhttit vuollái 15 mehtera fatnasiid dieđihanortnega geavatleamos ja ávkkáleamos vugiin.

Dan sáhttet sáddet gulaskuddamii áramusat ovdal geasi. Leat maid bivdán direktoráhta árvvoštallat dárbbašago vássán dálveáigodaga vásáhusaid vuođul rievdadit eará njuolggadusaid. Jos lea, de árvalusaid sáddejit sierra gulaskuddamii.