Ráđđehus áigu lasihit riddoguolásteami gánnáheami ja rekruterema

- Mii láhčit dál dilálašvuođaid dasa, ahte eanet nuorat sáhttet boahtteáiggis bargat guolásteaddjin. Buoret oahpahalliortnet ja unnimus fatnasiid buoret doaibmavuođđu leat mávssolaš vuogit hástalit nuoraid ealáhussii, stáhtaministtar Erna Solberg dadjala.

Ealáhus- ja guolástandepartemeanta sádde odne gulaskuddamii árvalusa, mii mielddisbuktá ahte maiddái unnimus fatnasat sáhttet čohkket máŋga eari ovtta fatnasii. Ráđđehus maid almmuha, ahte áigot rievdadit dálá oahpahalliortnega, nu ahte nuorat sáhttet váldit fárrui oahpahallieari dan fatnasii, mas sii leat oahpahallin.

- Buoret doaibmavuođuin šaddá vejolažžan ođasmahttit fatnasa ja oažžut buoret boađuid eaiggádii ja bargiide. Ja šaddá vejolažžan leat guovttis fatnasis. Mii diehtit, ahte okto bargi guolásteaddjit bártidit eanemusat, muitala guolástanministtar Elisabeth Aspaker.

- Ráđđehus sádde fargga gulaskuddamii oahpahalliortnega rievdadanárvalusa. Das árvaluvvo čatnat oahppoásahusaid eriid eanetge ovttaskas ohppiide, Aspaker deattasta.

- Mii leat áibbas sorjavaččat das, ahte riddofatnasiidda bohtet ođđa, nuorra guolásteaddjit. Dán áigge oahpahalli guolásteddjiid caggá oahpahallisaji váilun. Danin mii ásahit sierra eriid, maid sii sáhtte váldit mielde fatnasii, gos sii barget oahpahallin. Ortnet mielddisbuktá maid guolásteaddjái stuorát ávkki oahpahalli váldimis, seammás go oahpahalli ieš oažžu realistalaččat vásáhusaid guolásteaddji ámmáhis, Aspaker cealká.

Ráđđehusa ulbmil lea rievdadit oahpahalliortnega jo čakčii 2014.

Vuollái 11 mehtera riddoguolástanfatnasiid strukturearreortnega árvalus

• Árvalus mielddisbuktá, ahte sáhttá struktureret fanasjoavkku, maid guhkkodat lea vuollái 11 mehtera. Dat mielddisbuktá ovdamearkka dihte, ahte dán joavkku fanaseaiggát sáhttá oastit nuppi jovkui gullevaš fatnasa dainna jurdagiin, ahte áigu bistevaččat váldit dan eret guolásteames, ja de dan maŋŋá ohcat struktureari juolludeami álgofatnasii. Jos fatnasii juolluduvvo strukturearri, de sáhttá dainna maid guolástit vuođđoeari lassin.
• Strukturearri galgá vástidit dan fatnasa earrefáktorii, mii ii šat geavahuvvo guolástusas, muhto geahpeduvvo 20 proseanttain dan ovddas, go leat vel fatnasat, mat gullet vuollái 11 mehtera jovkui. Fanas, mii ii šat geavahuvvo guolásteapmái, ferte dábálaččat kondemnerejuvvot.
• Strukturearri juolluduvvo jahkái ain hávil, ja sáhttá juolluduvvot eanemusat 20 jahkái.