Olahusjahki norgga mearraborramuša olgoriikkavuovdima dáfus

- 2013 lea leamaš niehkojahki luossaealáhussii, muhto eará oasit norgga mearraealáhusas vásihit vuostálasvuođaid, cealká guolástusministtar Elisabeth Aspaker.

Árvu norgga mearraborramuša olgoriikkavuovdimis leai sullii badjelaš 61 miljárdda kruvnnu jagi 2013 loahpas. Lassáneapmi leai 17 proseantta jagi 2012 ektui, čájehit Norgga mearraborramušráđi logut. Dorskehivvodat lassánii 20 proseanttain jagi 2013, ja árvu fas njiejai čieža proseanttain. Luossahivvodat njiejai gis gávcciin proseanttain, ja árvu fas loktanii olles 37 proseanttain.

-Lea váttis ipmirdit dán dili. Guolleoastit leat dat seammá. Mu konklušuvdna lea ahte mii oažžut menddo vuollegis mávssu dorski ovddas, ja dainna áššiin fertet juoga bargat, dadjá Aspaker.

Guolástusministtar namuha erenoamážit márkanfievrrideami ja márkandutkama, maid ferte vuoruhit.
 
-Áiggun geavahit Dutkanráđi ja Innovašuvdna Norgga guoskevaš ruđaid veahkkin, muhto ealáhus ferte ieš maid searvat. Mun háliidan áinnas divaštallat márkandivadiid rievdadusaid, dadjá son.
 
Aspaker ohcala maid eanet dutkama mearraborramušsuorggis. Ráđđehusa mihttomearri lea ahte dutkanoassi galgá leat golbma proseantta Norgga brutto našuvnnalaš buktagis ja guokte goalmmátoassi das galgá ealáhusa iežas.

-Dál lea mariidnaealáhus bázahallan. Jos galggaš juksat boahtteáiggi ovdánanáigumušaid, de ferte stuorit deattu bidjat dálá dutkamii ja ovddideapmái, dadjala Aspaker.

Son deattuha ahte ráđđehusas leat seammá oaivilat go ealáhusas ovdánanáigumušaid ektui, ja dieđiha ahte ealáhusa rámmaeavttuid lea dárbu geahčadit.

-Ráđđehus háliida ovdánahttit mearraborramušealáhusa ain eanet ja fuolahit ahte Norgga  sorjavašvuohta oljoealáhussii unniduvvo. Mu beroštupmi lea loktet ealáhusa gánnáheami ja dál mii álggahat barggu geahčadit ealáhusa erenoamáš rámmaeavttuid. Mii fertet juohke geađggi jorahit lokten dihte árvoháhkama. Dalle fertet mii geahčadit sihke ealáhusa struktuvrra ja njuolggadusaid, cealká guolástusministtar Elisabeth Aspaker.