Háliida unnidit borramušaid doapparbáikkiin

- Guolli ja eará mearabiepmut leat dearvvašlačča  ja dehálaš oassi dearvvaš biebmodoalus. Dáid berre borrat iige bálkut doapparlihttái. Ealáhus sáhttá ávkkástallat vel eanet guolis, ja ráhkadit buoret doavnnji. Muhto sáhttet maid unnit bálkut doapparlihttái. Danin lea dehálaš láhčet buori dieđuid sidjiide geat ráhkadit biepmuid ja sidjiide geat dan ostet, dadjá guolástusministtar Elisabeth Aspaker.

Olles biepmogoallus dáhpáhuvvá biebmojávku, buvttadeaddji rájes geavaheaddji rádjai. Dutkan duođašta ahte leat geavaheaddjit geat eanemusat bálkot. Sihke biebmobuvttadeapmi ja biebmobázahusaid hálddašeapmi goarida luonddu. Geahpideames biebmojávkku de unniduvvo maiddái dát noađđi.

- Mii bálkut beare ollu biebmu Norggas, ja danin stajidit  árvvolaš buktagiid. Mii seastit ruhtaburssa ja birrasa jus mii nagodit geahpidit biebmojávkku. Dát ii leat dušše juohke ovttaskas geavaheaddji ovddasvástádus, muhto maiddái boandda, lágideddjiid ja rámbuvrraid ovddasvástádus, dadjá dálkkádat- ja birasministtar Tine Sundtoft.

Ráđđehus ja biebmosuorgi leat vuolláičállán intenšuvdnašiehtadusa mas leat lihtodan geahpidit biebmojávkku. Intenšuvdnašiehtadusas leat mearridan rámmaid movt ovddasguvlui bargat. Dehálaš bealit lea gávnnahit biebmojávkku sivaid, mearridit realisttalaš geahpidanmihtuid, ja ovdánahttit ja lonohallan buriid doaibmabijuid. 

Njealje stáhtaráđi leat vuolláičállán šiehtadusa; dálkkádatministtar Tine Sundtoft, eanandoalloministtar Sylvi Listhaug, guolástusministtar Elisabeth Aspaker, ja geavahusministtar Solveig Horne. Olles biebmosuorggi ovddasteaddjit leat maiddái vuolláičállán šiehtadusa; NHO Biebmu ja Jugus, NHO Mátkeealáhus ja Virke, Dállodoallogávppiid Birasforum, Dállodoallogávpelágideddjiid searvi ja Norgga Boanddaid Searvi, Norgga Boanddaid- ja Smávvadálolaččaid Searvi, Norgga Guolástussearvi, Guolástus- ja Mearraealáhusaid riikkasearvi ja Norgga Mearrabiebmofitnodagaid Riikkasearvi. Birasdirektoráhtta ja Matvett AS ledje mielde soahpamuša vuolláičállimis.