Ohcamin eanet mánáidgárdeoahpaheddjiid

Máhttodepartemeanta álggaha odne áŋgiruššama, mainna hástalit nuoraid mánáidgárdesuorgái. Áŋgiruššama namma lea “Oza máilmmi fiidnámus virgái” (verdens fineste stilling ledig) ja dál álggahuvvo áŋgiruššama goalmmát jahki.

 

– Bargiid gelbbolašvuohta lea mávssoleamos ášši, mainna ovddidit buriid mánáidgárddiid. Áŋgiruššama ulbmil lea oažžut eanet gelbbolaš ohcciid mánáidgárdeoahpaheaddjeohppui ja loktet mánáidgárdebarggu stáhtusa, máhttoministtar Torbjørn Røe Isaksen muitala.

Dán jagi áŋgiruššamiin áigot čalmmustahttit mánáidgárddi máŋggabealat eallima ja fuopmášuhttit olbmuide, ahte mánáidgárddis lea earáge, go duhkoraddan ja mánnáoaidnin. Mii háliidit čájehit man mávssolaš mánáidgárddi ja mánáidgárdeoahpaheaddji gelbbolašvuohta lea mánáid oahppamii ja ovdáneapmái. Dán jagi servet mánáidgárddit ja mánáidgárdemánát aktiivvalaččat áŋgiruššamii ja leat mielde gaskkusteamen man mávssolaš barggu mánáidgárdeoahpaheaddjit barget.

Áŋgiruššama čalmmustahtte Ullern joatkkaskuvllas, gos mánáidgárdemánát geigejedje áviissa ”Barnas hverdagsliv” skuvlla maŋimuš jagi ohppiide. Mánáidgárddit miehtá riikka leat doaimmahan sisdoalu áviisii. Mánáidgárddi pedagogalaš bargu čájehuvvo buriid ovdamearkkaiguin. Olles riikkas leat GLØD-fierpmádagaid olis lágidan sullasaš deaivvademiid mánáidgárdemánáide ja joatkkaskuvllaid maŋimuš luohkáid ohppiide.

- Deaivvademiiguin leat háliidan čájehit, ahte mánáidgárdi lea gelddolaš ja geasuheaddji bargosadji. Sávan, ahte ollugat ozašedje mánáidgárdeoahpaheaddjeohppui, máhttoministtar dadjala.

– Mii dárbbašit eanet čeahpes mánáidgárdeoahpaheddjiid, nu ahte mánát ožžot mánáidgárdefálaldaga, mas lea buorre dássi.

Áviisa lea dušše oassi dán jagi áŋgiruššamis. Dán jagi ráhkadit maiddái blokka, mas suorgái gullevaš aktevrrat ja suorggi olggobeale aktevrrat bloggejit mánáidgárddi, fidnu ja oahpu birra áŋgiruššanáigodagas. Mánáid máinnusfilbma juhkkojuvvo sosiála mediaid bokte ja dainna hástalit nuoraid, geat áigot ohcat oahpu, neahttasiidui  Verdensfinestestillingledig.no gos muitaluvvo eanet oahpu ja fidnu birra.