Vuoruha kvalitehta mánáidgárddis

Eai goassege ovdal leat atnán eanet ruđaid kvaliteahtabuorideapmái mánáidgárddis. Ráđđehus áigu adnit 60 miljovnna ruvnno nannet mánáidgárdebargiid gelbbolašvuođa. Seammás hálbu mánáidgárdi daid bearrašiidda geain leat vuollegis bálkkát.

 

– Mánáidgárdebargit leat áibbas dehálačča go galgat ásahit buori mánáidgárddi. Danin mii vuoruhat gelbbolašvuođa nannet ja buorideames buot mánáidgárddi ámmátjoavkkuin, dadjá máhttoministtar Torbjørn Røe Isaksen.

 

Oktiibuot árvala Ráđđehus jagi 2015:s juolludit 275 miljovnna ruvnno kvaliteahtabuorideapmái mánáidgárdesuorggis. Dát lea 110 miljovnna eanet go mii 2013:s geavahuvvui kvalitehta buorideapmái.

 

Hálbbibun váhnemiidda geat leat vuollegis bálkkát

Ráđđehus áigu dagahit mánáidgárddi hálbbibun bearrašiidda geain leat vuollegis bálkkát.  Dál váhnenmáksohálbbádusat rievddadit nuppi suohkanis nubbái. Dál juolluduvvo 112 miljovnna ruvdno vai sáhttet álggahit nationála unnimusgáibádusa váhnenmávssu geahpideapmái. Dán evttohusa mielde galgá váhnenmáksámuš vuosttaš mánáidgárdemáná ovddas eanemusat leat čieža proseanta bearraša oppalaš dietnasis, ja nu ahte nu ahte dievashaddi lea bajimus máksomearri. Oarbinaččaid máksinvuoládus bisuhuvvo muđui eará mánáid ovddas. Buot bearrašiin geain oppalaš jahkedienas lea vuolil 405 000 ruvnno lea vuoigatvuohta oažžut geahpiduvvot váhnenmáksomeari. Evttohus lea sáddejuvvon gulaskuddamii 2014 čavčča, ja galgá plána mielde fápmuiboahtit jagi 2015 borgemánu 1. beaivvi. 

 

Ođastus ruhtaduvvo dievashatti lasihemiin čuđiin ruvnnuin 2015 ođđajagimánu 1.beaivvi rájes. Jagi 2015 bušeahtas árvala ráđđehus mearridit mánnosaš dievashatti 2 580 ruvdnui.

 

– Dát lea dehálaš vai maiddái sis geain leat vuollegis bálkkát maiddái galgá leat vejolašvuohta válljet mánáide mánáidgárdesaji. Mii árvalat danin máksinvuogádaga mas lea buoret sosiála hápmi, dadjá máhttoministtar.

 

Mánáidgárdesaji haddi lea ain hálbi. Jagi 2015 lea mánáidgárdesaji haddi duođas vuollegeabbo go maid dat lei jagi 2011:s. Mánáidgárdesaji váhnemiid máksooassi lea dál 14 proseanta obbalaš goluid ektui, ja 2006:s váhnemat mákse 20 proseanta mánáidgárddi obbalaš goluin.

 

Máškidat sisaváldin mánáidgárdái

Ráđđehus árvala juolludemiid bakte suohkaniidda juolludit 100 miljovnna ruvnno mii galgá sihkkarastit eanet máškidis sisaváldima mánáidgárddiide. Árvalus mearkkaša ahte suohkanat sáhttet ásahit eanet mánáidgárdesajiid, vai mánát geat devde ovtta jagi čakčamánu 1.beaivvi dahje maŋŋil dan beaivvi, eai dárbbaš vuordit mánáidgárdesaji nu guhka. Ráđđehusa árvalus láhče vuođu suohkaniidda gávnnahit buriid ja máškidis sisváldinčovdosiid báikkálaččat.