Statsbygg oažžu barggu plánet Sámi joatkka- ja boazodoalloskuvlla ja Beaivváš teáhtera lokaliserema seamma vistái

– Mun lean ilus go mii dál leat čielggadan joatkkaskuvlla geainnu viidáseappot ja ahte skuvla ja sámi teáhter galgaba seamma vistái. Dát sáhttá nannet giellafágaid go besset vásihit sámegielaid eanet oainnus vugiid bokte nugo neaktimiiguin. Eará oahppoplánamihttomeriid sáhttá maid olahit ovttasbarggu bokte teáhteriin, ovdamearkka dihte sáhttet sii geat vázzet teknihkka- ja industriijabuvttadeamis dahje huksen- ja ráhkadusteknihkas ráhkadit biktasiid neaktinbihtáide dahje lávdedávviriid. Dáinna sáhttá maid buoridit rekrutterema skuvlii, ja dan mii háliidit doarjut, dadjá diehto- ja integrerenministtar Jan Tore Sanner.

Sihke skuvllas ja Beaivvážis lea guhkit áiggi leamaš dárbu ođđa visttiide. Dát čoavddus sáhttá addit teáhterii ja skuvlii buriid vejolašvuođaid atnit ávkki nubbi nuppis ja maid nannet sámi kultuvrra ja sámegielaid.

–Oktasaš visti sáhttá mielddisbuktit ealáskahttima sihke skuvlii ja teáhterii ja eará vuoimmi fálaldagaide go odne lea. Beaivváš lea okta Norgga nationála teáhterásahusain. Dan dihte lea deaŧalaš láhčit dili buriid ja boahtteáigásaš čovdosiidda. Mu doaivva lea ahte mii dáinna sáhttit oažžut dan potensiála maid teáhter oaidná nuorra, sámegielat neavttáriid rekrutteremii, dadjá kulturministtar Trine Skei Grande.

Sámi nationála teáhter Beaivváš álggahuvvui álggos friddjajoavkun jagis 1981. Jagis 1987 vuođđuduvvui Beaivváš oasussearvin ja kulturásahussan, jagis 1991 biddjui teáhter fásta poastan norgga stáhtabušehttii, ja jagis 1993 definerejuvvui Beaivváš nationála teáhterásahussan Norggas.

Sámi joatkka- ja boazodoalloskuvla álggahuvvui jagis 1952, go Stáhta ruovttufidnoskuvla sámiide álggahuvvui. Jagis 1988 časkojuvvui dát skuvla oktii Stáhta boazodoalloskuvllain. Sámi joatkkaskuvla Guovdageainnus lea áidna skuvla mii fállá oahpahusa boazodoalus, duojis ja árktalaš biebmofágas.

– Ođđa oktasaš visti Guovdageainnus sáhttá mearkkašit positiivvalaččat olles sámi servodahkii. Norgii lea deaŧalaš ja riggodahkan áimmahuššat sámegielaid, sámi kultuvrra ja árbevieruid. Sihke skuvla, teáhter, suohkan ja Sámediggi leat positiivvat bidjat dáid seamma vistái, juoga mii maid lea leamaš deaŧalaš dán áššis, dadjá gielda- ja ođasmahttinministtar Monica Mæland.