Norga ja Suopma leat lihtodan ođđa boazoáidešiehtadusa

Kárášjogas lea Sylvi Listhaug, Norgga eanandoallo- ja biebmoministtar ja Suoma eanandoalu ja vuovdedoalu ministtar, Petteri Orpo, odne vuolláičállán ođđa šiehtadusa dáid guovtti riikkaid gaskkas mii earret eará guoská boazoáiddiide.

Šiehtadus guoská áiddiide mat galget eastadit bohccuid rasttideames Norga-Suoma rájá miehtá Deanu ja Anárjoga čázádagaid. Suopma galgá hukset ja áimmahuššat áiddi gaskal Áŋŋel ja Boares Gáregasnjárgga, ja Norga galgá hukset ja áimmahuššat áiddi gaskal Boares Gáregasnjárggas ja Leavvajoga. Leavvajogas Buolbmágii ii huksejuvvo áidi.

- Suopma ja Norga lea guhká ovttasbargan biebmu ja luondduvalljodagaid hálddašemiin. Mun jáhkán ahte dát ođđa šiehtadus dagaha dán ovttasbarggu vel buoret, dadjá Sylvi Listhaug, Norgga eanandoallo- ja biebmoministtar.

Boazoáidekommišuvnnas, mas galget leat guhtta miellahtu, golbma goappáge riikkas, lea ovddasvástádus huksemis ja áimmahuššamis áiddiid. Jus eai leat nu ollu bohccot mat besset rastá rájá, eaige leat nuppi riikkas nu guhká, de sáhttet boazoeaiggádat gaskaneaset šiehtadit  movt viežžat ruoktot bohccuid mat leat beassan nuppi riikii.

Dát ođđa šiehtadus válbme ja geahpida vuogádaga man mielde mákset buhtadusaid rádjerasttideami dihte. Riikkat leat geatnegahttojuvvon máksit buhtadusa nuppi riikii maŋimusat jagi maŋŋil go buhtadusgáibádus lea čielggaduvvon. Stáhta sáhttá ovddidit regreassagáibádusa boazoeaiggádiidda jus iešdáhtolašvuohta dahje várrameahttunvuohta lea sivvan vahágii. Boazoeaiggádiin lea lohpi johtit bohccuiguin rastá rájá johtolaga mielde mii lea dohkkehuvvon dán ulbmilii.

Čuovvovaš lávki maŋŋil vuolláičállima lea ahte šiehtadus galgá dohkkehuvvot Stuorradikkis Norgga ja Riikkabeaivvis Suomas. Šiehtadus lea fámus maŋŋil go riikkat leat dohkkehat šiehtadusa ja lea dan almmuhan nuppi riikii. Šiehtadus galgá leat fámus 30 jagi, ja lea vihtta  jagi eretcealkináigi, ja das maŋŋil logijagiáigodagaid, ja guokte jagi eretcealkináigi.