Ođđa Eanandoallodirektoráhtta

Stáhtaráđđi lea otne mearridan ásahit ođđa direktoráhta man namma galgá Eanandoallodirektoráhtta. Eanandoallodirektoráhtta váldá badjelasas Stáhta boazodoallohálddahusa (SBH) ja Stáhta eanandoallohálddahusa (SEAH) doaimmaid ja bargoveaga suoidnemánu 1.b.2014 rájes. 

Ođđa direktoráhtta galgá vástidit buot eanandoallosuorggi fágaáššiid ja muđui eará eanandoalloguoskevaš ealáhusdoaimmaid, nugo eanandoalu, boazodoalu, vuovdedoalu ja eará doaimmaid mat geavahit eanandoalloresurssaid.

Dálá SBH hálddahusdirektevra, Jørn Rolfsen, virgáduvvo mearreáigái Eanandoallodirektoráhta hálddahusdirektevran suoidnemánu 1.b.2014 rájes suoidnemánu 1.b.2018 rádjai. 

SBH ja SEAH ovttastahttinmearrádus dahká vejolažžan ovddidit viiddis fágabirrasa ja nanusmahttit gelbbolašvuođa boahttevaš boazodoalu hálddašeamis. Oktasašbálvalusaid ovttastahttima geažil lea maid vejolaš beavttálmahttit oktasašbálvalusaid. Eanandoallodirektoráhta hálddahus ásahuvvo sihke Osloi ja Áltái. Direktoráhta ossodat mii bargá boazodoalloáššiiguin ásahuvvo Áltái. 

Ráđđehus vuoruha uhcit byrokratiija ja beaktilis hálddašeami. SBH ja SEAH ovttastahttin lea dehálaš doaibmabidju dan oktavuođas. Ovttastahttin nanusmahttá maiddái nationála boazodoalloválddi, ja addá buoret hálddahuslaš fálaldagaid boazodollui oppalohkái, cealká eanandoallo- ja biebmoministtar Sylvi Listhaug.