Norgga-Ruoŧa boazoguohtunkonvenšuvdna

– Mun mearkkašan ahte mu ruoŧa bargoustit čielgasit háliida čovdosa ođđa konvenšuvdnii, ja ahte dat galggašii johtilit dáhpáhuvvat, muitala eanadoallo- ja biebmoministtar Jon Georg Dale.

Ruoŧa bealis lea leamaš dárbu eanet čielggadit áššiid mat gusket ee. riektesihkkarvuhtii ja dan olis lea ráhkaduvvon čielggadeapmi mii dál sáddejuvvo gulaskuddamii. Dan barggu vuođul áigot ruoŧa eiseválddit čilget movt sii oaivvildit dát bargu galggašii viidáset fievrriduvvot  2016 lohppii. 

Eanadoallo- ja biebmoministtar Jon Georga Dale lohká ahte dál lea hoahppu.  

– Dat lea leamaš ádjás bargu oažžut áigái Norgga-Ruoŧa boazoguohtunkonvenšuvnna. Vuođđu leai juo biddjon jagi 2009. Dálá eahpečielga dilli dagaha vahágiid sihke ruoŧa ja norgga boazoeaiggádiidda, dadjá Dale. 

Maŋimuš konvenšuvdna loahpahuvvui jagi 2005

Norga ja Ruoŧŧa leaba juo guhkit áiggi bargan oažžut sadjái boazoguohtunkonvenšuvnna maŋŋá go ovddit konvenšuvdna loahpahuvvui jagi 2005. Čoahkkimis Lulejus golggotmánus 2015 gos diet guokte ministara oassálasttiiga bođii čielgasit ovdan ahte ođđa konvenšuvdna galggašii doaimmas loahpageahčen 2016. 

Ođđajagimánu 2016 lágiduvvui čoahkkin gaskal eanadoallo- ja biebmoministara Jon Georg Dale ja eanadoalloministara Sven-Erik Bucht dán áššis.  Čoahkkimis almmuhedje ruoŧa eiseválddit ahte sii áigot čielggadišgoahtit eanet dehálaš gažaldagaid. Bargu lea dál válmmas, ja norgga eiseválddit vurdet movt Ruoŧŧa dál čuovvola čielggadanbarggu.