Finnmark Rein lea jagi bohccobiergogaskkusteaddji 2018

– Sávan lihku Finnmark Reinii jagi bohccobiergogaskkusteaddjin 2018. Sii leat innovatiivvat ja čeahpit ovddidit buktagiid. Sii leat bargguset bokte leamaš mielde ovddideamen bohccobiergoealáhusa. Dat buktá árvoráhkadeami ealáhussii ja váikkuhusat vuhttojit báikkálaččat, guovllu dásis ja riikka dásis, muitalii Eanandoallo- ja biebmodepartemeantta stáhtačálli Widar Skogan, go geigii bálkkašumi bohccobiergoealáhusa suorgedeaivvadeames Romssas.   

Finnmark Rein fállá ollu iešguđetlágan buktagiid, mat ráhkaduvvojit olles bohccos. Sin ulbmilin lea geavahit olles ealli buvttaovddideames, ja sii muitalit bohccobierggu duogážis. Finnmark Rein lea leamaš mielde buorideamen bohccobierggu kvaliteahta ja hatti, maid badjealmmái oažžu. Sii leat máŋggaid jagiid leamaš bálggesčuollin eará fitnodagaide máŋgga suorggis. 

• Loga eanet Finnmark Rein birra

– Mun sávan ahte bálkkašupmi movttiidahttá ain áŋgiruššat ealáhusa ovdii, dadjá stáhtačálli Widar Skogan.

Jury ákkastallan

Jury lea deattuhan fitnodaga čehppodaga ja áŋgiruššama dan ovdii, ahte muitalit gos biergu boahtá, ja seammás čalmmustahttit daid nissoniid ja albmáid, duoddariid sáŋgáriid, geaid bargu lea lávgalagaid assosiašuvnnaiguin, mat laktásit borramuššii, mii boahtá norgga bohccobierggus. Fitnodagas lea álggu rájes leamaš gulahallanstrategiija ja sii leat bargan aktiivvalaččat iešguđet mediaid ektui, vai bohccobierggu ja boazodoalu buorit bealit boađášedje ovdan. Seammá mávssolaš, go loktet oidnosii árbevirolaš boazodoalu, lea gulahallamis leamaš mávssolaš čájehit nuorra ealáhusbargiid, geat heivehit doaimmaset boahtteáiggi nammii, ja geaid ulbmil lea buvttadit bohccobierggu, mas lea alla kvaliteahtta.

Lea mávssolaš, ahte lea kvaliteahtta árvoviđjji buot osiin, duoddaris gitta beavddi ala. Jury deattuha vel erenoamážit ahte fitnodagas leat innovatiivvat hábmemiin, ja ahte sii oidnet máisttu ja kvaliteahta mearkkašumi. Jury namuha maid ahte jagi bohccobiergogaskkusteaddji lea oinnolaš boazodoalu ambassadevra. Fitnodat ovddida digaštallama ja ságastallama norgga bohccobierggu geavaheami birra.

Jurys leat leamaš eanandoallo- ja biebmoministtar Olaug Bollestad, Norgga boazosápmelaččaid riikkasearvvi jođiheaddji Ellinor Jåma ja Bohccobierggu márkanlávdegotti jođiheaddji John Anders Lifjell.

Bálkkašumi ulbmil

Bohccobierggu márkanlávdegoddi lea ásahan Jagi bohccobiergogaskkusteaddji bálkkašumi. Jagi bohccobiergogaskkusteaddji bálkkašumi ulbmil lea čalmmustahttit ja addit dovddastusa ovttaskas olbmuide, ásahusaid dahje fitnodagaide, mat aktiivvalaš ja jotkkolaš gaskkustemiin leat leamaš mielde nannemin bohccobierggu positiiva beaggima. Bálkkašumi juhko vuosttaš háve Sámi álbmotbeaivve, guovvamánu 6. b. 2015.

Go válljejit geasa addet «Jagi bohccobiergogaskkusteaddji», de gáibiduvvo evttohasas, ahte son lea aktiivvalaččat ja jotkkolaččat gaskkustan bohccobierggus ráhkaduvvon borramušaid. Dan lassin ahte son lea gaskkustan eará positiiva beliid bohccobierggus, mat gullet Márkanlávdegotti árvvuide: 

• Duoddariid sáŋgár
• Vehá lagabus luonddu
• Smierus, álbmái ja dearvvašlaš
• Borramuš buori searvvis

Ovddit vuoitit:

• Jagi bohccobiergogaskkusteaddji 2014: Fjellvilt
• Jagi bohccobiergogaskkusteaddji 2015: Ellinor Guttorm Utsi
• Jagi bohccobiergogaskkusteaddji 2016: Røros Rein
• Jagi bohccobiergogaskkusteaddji 2017: Skodi Rein
• Jagi bohccobiergogaskkusteaddji 2018: Finnmark Rein