Stáhtaráđđi Bollestad rámis boazodolliin

Eanandoallo- ja biebmoministtar ja Boazodoallostivra dollet juohke jagi čoahkkima, mas muitalit áigeguovdilis dieđuid boazodoalloealáhusa birra. Politihkalaš njunnošiid ja stivrra gulahallan lea mávssolaš, vai šaddá oktasaš áddejupmi boazodoalu hástalusain ja vejolašvuođain.

– Lean čuvvon dárkilit boazodoalloealáhusa vássán jagi. Roassodálvvi 2020 birra lei ollu sáhka, diehttelasat. Lean rámis badjeolbmuid barggus, maid sii dahke ereliiggán váttis dilis, ja dat nanne mu áddejumi boazodoalus dakkárin go lean dan vásihan iežan áigodagas eanandoallo- ja biebmoministtarin, ahte dat lea ealáhus mainna barget áŋgiris ja čeahpes badjeolbmot, dadjá eanandoallo- ja biebmoministtar Olaug Bollestad (KrÁ).

– Buorre hálddašeapmi lea mávssolaš vai olahit nana, boahtte áigái ráhkkanan boazodoalloealáhusa, ja mun anán árvvus dieđuid ja gulahallama Boazodoallostivrrain. Boazodoallostivra lea muitalan dihto áššiid dili birra, ja maiddái guhkes áiggi áššiid birra, mat gusket ealáhussii oppalaččat. Munnje lea ávkin go dieđán maid Boazodoallostivra oaivvilda dáid áššiin. Illudan ain lavga, buori ovttasbargui stivrrain, dadjá Olaug Bollestad.

Áššit, maid birra lei sáhka čoahkkimis:

• Boazodoallolága rievdadanárvalus
• Trollheimena boazodoallu ja Trollheimenláhka
• CWD/oaivevuorri
• Boazodoalu roassodálvi 2020
• Molssaeavttut boazodoalu bistevaš áiddiid ceggemii
• Stivrra bargoulbmilat 2021

Boazodoallostivrra birra

Boazodoallostivra lea boazodoalloeiseválddiid, boazodoallodutkama ja bagadallanbálvalusa fágalaš ráđđeaddi, ja galgá meannudit áššiid, mat dasa leat biddjon boazodoallolágas. Boazodoallolága § 71 vuođul galgá nammadit Boazodoallostivrra, mas leat čieža lahtu ja guđesge várrelahttu, ja njeallje lahtu ja sin várrelahtuid nammada Eanandoallo- ja biebmodepartemeanta, ja golbma lahtu ja sin várrelahtuid nammada Sámediggi.

Boazodoallostivrra lahtut leat:

• Inge Ryan, jođiheaddji, ođđa Nåavmesjenjaelmie/Namsos gieldda ráđđeaddi 
  • Várrelahttu: Christian Rekkedal, Vestland fylkkamánni eanandoallodirektevra

• Siri Vigmostad, Larvik diggegotti sundi 
  • Várrelahttu: Kjetil Linde Holo, advokáhta advokáhtafitnodagas Bjørge – Skaaraas og Co AS.

• Asgrim Opdal, dálolaš ja jođiha Filefjell reinlag.
  • Várrelahttu: Ragnhild Normann Jakobsen, Vågå boazosearvvi guođoheaddji

• Ragnhild Sparrok Larsen, Nordland boazoguohtunguovllu boazoeaiggát.
  • Várrelahttu: Ole Johan Johnsson Eira, Romssa boazoguohtunguovllu boazoeaiggát.

• Inge Even Danielsen
  • Várrelahttu: Bjørn Thomas Åhrèn, sámepolitihkár/Davvi-Trøndelaga boazoguohtunguovllu ráđđeaddi.

• Inger Marie Gaup Eira
  • Várrelahttu: Berit Marie P.E. Eira, Oarje-Finnmárkku boazoguohtunguovllu boazoeaiggát/sámepolitihkkar

• Leif Anders Somby
  • Várrelahttu: Anders Somby jr., Nuorta-Finnmárkku boazoguohtunguovllu boazoeaiggát