2020/2021 boazodoallošiehtadusa šiehtadallan:

Norgga boazosápmelaččaid riikkasearvi lea ovddidan gáibádusaidis

Historjjálaš arkiiva

Almmustahttináigodat Solberga ráđđehus

Almmustahtti: Eanandoallo- ja biebmodepartemeanta

Ođas | Almmustahtton: 09.01.2020 | Maŋimuš ođasmahttojuvvon: 13.01.2020

Norgga boazosápmelaččaid riikkasearvi (NBR) geigii odne stáhtii iežas gáibádusa 2020/2021 boazodoallošiehtadusa šiehtadallamii.

Gáibádusa ekonomalaš rámma lea 236,6 miljovnna kruvnno. Dat lea 100,5 miljovnna eanet go dálá šiehtadusas, mii lea 136,1 milj. kruvnno. Lassáneapmi lea 74 proseantta.

NBR gáibádus 2020/2021 boazodoallošiehtadussii (pdf)

NBR gáibida lasáhusa njuolggodoarjagiidda ja čálgoortnegiidda, vai nannet boazodoalu ekonomalaččat ceavzilis ealáhussan. NBR čujuha ahte dasa gullet mávssolaš oasit, nu mo geahpedit bohccuid massima boraspiriide, ja sihkkarastit boazodoalu guohtumiid. NBR gáibida maid ahte boazodoalu gessosa lasihit seammá dássái eanandoallogessosiin. NBR gáibida maid ođđa ortnega, mas leat dálkkádat- ja birasdoarjagat meahcceguohtumii, danin go ealáhusas leat hástalusat dálkkádaga rievdamiin. NBR čujuha, ahte boazodoalus dárbbašit ovddidan- ja investerendoaimmaid, ja bivdá lasihit Boazodoalu ovddidanfoandda doarjjaruđa.

Stáhta šiehtadallanjođiheaddji, Anne Mari Glosli, Daid geigii Norgga boazosápmelaččaid riikkasearvvi (NBR) jođiheaddji, Ellinor Marita Jåma. — Stáhta šiehtadallanjođiheaddji, Anne Mari Glosli, oaččui odne NBR gáibádusaid 2020/2021 boazodoallošiehtadusa várás. Daid geigii Norgga boazosápmelaččaid riikkasearvvi (NBR) jođiheaddji, Ellinor Marita Jåma. Govva: Eanandoallo- ja biebmodepartemeanta

Stáhta ovddida iežas fálaldaga duorastaga ođđajagemánu 30. b. 2020, ja šiehtadallamiin galget geargat ovdal njukčamánu 1. b. 2020. Eanandoallo- ja biebmodepartemeanta šiehtadallá juohke jagi Norgga boazosápmelaččaid riikkaservviin (NBR) boazodoallošiehtadusa.