Eanet váhnemat galget oažžut vejolašvuođa dikšut mánáideaset geat leat duođalaš buohcci

– Ráđđehus viiddida dikšunruhtaortnega vai eanet váhnemat ožžot vejolašvuođa dikšut mánáideaset geat leat duođalaš buohcci, dadjá bargo- ja sosiálaministtar Anniken Hauglie. 

Láhkaproposišuvdna oktan konkrehta láhkarievdadusaiguin ovddiduvvo 2017 álggus. Ráđđehus čuovvula dikšunruđaid rievdadusárvalusa mii sáddejuvvui gulaskuddamii čakčat 2015. 

Ráđđehus árvala váhnemiid searvat iešguhtetlágan joavkkuide gos leat mánát geat dárbbašit divššu, ja geain ii leat vuoigatvuohta oažžut dikšunruđaid.  Dat guoská guhkesáiggi buohcci mánáide ja mánáide mat álo dárbbašit divššu. Maiddái váhnemiin geain leat badjel 12 jahkásaš mánát ja geat masset bargotietnasa dan sivas go mánát leat buohcceviesus, lea dál vuoigatvuohta oažžut dikšunruđaid, ráđđehusa ođđa njuolggadusárvalusa mielde. Árvalus mearkkaša ahte ollu eanet váhnemat go dál sáhttet oažžut dikšunruđaid. Ráđđehus árvala ahte dikšunruhtaortnet galgá čuovvut seamma logihka go dalle go ieš lea buohcci ja oažžu jagi 100 proseantta buhtadusa, ja dasto 66 proseantta  tietnasis. Árvaluvvo maid áigeráddjejuvvon ortnet mii mearkkaša ahte jos vuostáiváldá 100 proseantta dikšunruđaid de ii oaččo daid eanet go 1300 beaivvi ovddas (vihtta jagi).    

Ráđđehus áigu, gulaskuddancealkámušaid vuođul, láhčit dili nu ahte váhnemat geain leat stuora dikšundoaimmat galget vuoruhuvvot jos sáhttet leat muhtun oasi barggus ja dieinna lágiin guhkidit dikšunruhtavuostáiváldináiggi. Dat mielddisbuktá ahte ortnet guhkiduvvo 2600 beivviin (10 jagi) jos ovdamearkka dihte vuostáiváldá 50 proseantta dikšunruđaid ja muđui lea tienasbarggus.

Ollislaš árvalusa mielde lassánit jahkásaš golut sullii 560 miljovnna kruvnnuin, mii mearkkaša ahte álbmotoaju dikšungolut šaddet beali stuorit. Vuostáiváldiid lohku maid lassána 8000-9000 olbmuin, mii lea sullii beali eanet go dál. 

Dan lassin leat ortnegat nu go veahkkedoarjja ja fuolahusbálká hirbmat dehálaččat daid bearrašiidda geain leat mánát geat dárbbašit erenoamáš divššu.