Álbmotoadjogolut

Lassáneapmi lea vuosttažettiin dan sivas go leat stuorit golut ahkepenšuvdnii ja bargonávccahisvuođaodjui. Seammás unnot golut go golut beaiveruhtaortnegii ja bargočielggadanruhtii leat unnon.

Ahkepenšuvdna

Golut ahkepenšuvdnii lassánit 223 miljárdda ruvnnos salderejuvvon 2018 bušeahtas sullii 232 miljárdda ruvdnui jagis 2019.

Golut ahkepenšuvdnii lassánit dan dihte go ahkepenšunistalohku lassána. Jagi 2018 rájes 2019 rádjái meroštallet ahkepenšunistalogu lassánit sullii 20 000:n, sullii 949 000 olbmui. Jagi 2019 meroštusas lea oadjoloahpparehkega meroštallojuvvon čuozahus 2018 rájes sullii 5,7 miljárdda ruvnno.

Jagi 2011 rájes šattai vejolaš váldit ahkepenšuvnna 62 jagi rájes, 67 jagi ektui ovdal. Máŋgasat válljejedje váldit ahkepenšuvnna ovdal 67 jagi, ja dat mielddisbuvttii ahte ahkepenšuvdnagolut lassánedje olu 2011 rájes ja čuovvovaš jagiin. Jahkásaš ahkepenšunistalogu lassáneapmi sis geat leat vuollel 67 jagi lea unnume ja rehkenasto jámmásit 2017 rájes. Ahkepenšuvdnagolut bohtet goitge lassánit olu maid boahttevaš jagiin, vuosttažettiin dan sivas go šaddet eanet ahkepenšunisttat badjel 67 jagi.

Buohcanruhta bargiide

Golut buohcanruhtii bargiide lea meroštuvvon 37,2 miljárdda ruvdnui jagis 2019. Dat lea 0,3 miljárdda ruvnno unnit go jagi 2018 salderejuvvon bušeahtas.

Rievdan dássážii dán jagi čájeha ahte oadjoruhtaduvvon buohcanjávkan ain bargi nammii lea njiedjan 2017 ektui, ja dan dihte biddjo vuođđun 4 proseantta vuolideapmi oadjoruhtaduvvon buohcanjávkamis 2017 rájes 2018 rádjái. Jagis 2019 biddjo nullalassáneapmi vuođđun. Buohcanruhtagoluid váikkuha maid rievdamat barggahusas.  

Jagis 2017 máksojuvvui buohcanruhta 10,6 beaivvi ain bálkávuostáiváldi nammii. Jus mudde graderejuvvon buohcanjávkama, de máksojuvvui buohcanruhta 8,3 beaivvi ain bálkávuostáiváldi nammii jagis 2017. Dát lea unnit go jagis 2016 go máksojuvvui buohcanruhta 8,6 beaivvi, mii dahká 3,6 proseantta njiedjama. Go mudde graderejuvvon buohcanjávkama lei buohcanruhtabeaivelohku ain bargi nammii jagis 2017 vuolimus dásis jagi 1995 rájes.

Bargočielggadanruhta

Bargočielggadanruhta lea jagis 2019 bušeterejuvvon 31,7 miljárdda ruvnnuin. Dat lea 3,1 miljárdda ruvnno unnit 2018 salderejuvvon bušeahta ektui.

Bargočielggadanruđa vuostáiváldiid lohku lea njiedjan 2011 geasi rájes, ja jagis 2018 vurdojuvvo ahte vuostáiváldiid lohku ain njiedjá. Vuostáiváldiid gaskamearálaš logu meroštus jagis 2019 lea 127 200, dan ektui go ledje 134 700 jagis 2018. Dát lea vuosttažettiin dan sivas go sirdašupmi bargonávccahisvuođaodjui lea lassánan, muhto maid lassánan sirdašupmi earret eará bargodillái dahje sosiálaveahkkái. Njiedjan lea maid dan geažil go ođđa bargočielggadanruđa vuostáiváldiid lohku leat unnon. Gaskamearálaš G lassáneami čuozahus jagi 2018 rájes 2019 rádjái lea mielde lasiheame goluid jagis 2019 sullii 1,0 miljárdda ruvnnuin.  

Bargonávccahisvuođaoadju

Golut bargonávccahisvuođadoarjagiidda lea meroštuvvon 93 miljárdda ruvdnui jagis 2019. Dat lea lassáneapmi 2018 salderejuvvon bušeahta rájes sullii 6,5 miljárdda ruvnnuin.

Gollolassáneapmi lea dan sivas go leat eambbogat geat ožžot bargonávccahisvuođaoaju. Vuostáiváldiid gaskamearálaš logu meroštus jagis 2019 lea 340 900, dan ektui go ledje 331 900 jagis 2018. Vuostáiváldiid logu rievdan váikkuhuvvo das go leat ollugat geat sirdásan bargočielggadanruhtaortnegis, ja go sin lohku geat ožžot ahkepenšuvnna lea veahá njiedjan ovddit jagiid ektui. Gaskamearálaš G lassáneami čuozahus jagi 2018 rájes 2019 rádjái lea mielde lasiheame goluid jagis 2019 sullii 3 miljárdda ruvnnuin. 

Beaiveruđat bargguhisvuođas

Beaiveruhtajuolludeapmi 2018 salderejuvvon bušeahtas lei 13,3 miljárdda ruvnno. Reviderejuvvon 2018 nationálabušeahtas unniduvvui beaiveruhtajuolludeapmi sullii 11,6 miljárdda ruvdnui. Unnideami 2018 rájes 2019 rádjái ferte geahččat dan oktavuođas ahte bargodilis lea leamaš positiivvalaš ovdáneapmi mii dahká ahte leat unnit beaiveruhtavuostáváldit. Bušeahttaevttohusa ferte maid geahččat ráđđehusa evttohusa oktavuođas ahte rievdadit beaiveruhtaortnega.