Áššedovdijoavku mii guorahallá koalla- ja petroleumfitnodagaide investerema ja dálkkádatgássaluoitimiid - bargoviidodat

Duogáš

Stáhta olgoriikka penšuvdnafoandda (SOP) ulbmil lea doarjut stáhta seastima dan nammii, ahte ruhtadit álbmotoaju penšuvdnagoluid ja sihkkarastit guhkes áigodaga dárbbuid, go geavahit stáhta petroleumboađuid. Investeremiid ulbmil lea olahit foandda kapitálii nu buori riikkaidgaskasaš oastinfámu go vejolaš válddekeahttá menddo stuorrá riskkaid. Dan láhkai mii geahččalit sihkkarastit, ahte min oktasaš seasttut leat ávkin sihke dálá ja boahttevaš buolvvaide.

2004 ásahedje SOP hálddašeapmái etihkalaš njuolggadusaid. Daid divustedje 2009 ja ásahedje dálá njuolggadusaid, mat gusket dárkumii ja fitnodagaid hilgumii. Njuolggadusaid vuođul foandda ruđaid ii galgga earret eará investeret fitnodagaide, mat barget dihtolágan buvttademiin ja ahte sáhttá maid hilgut foandda investerenviidodagas fitnodagaid, go lea dohkkemeahttun riska, ahte fitnodat lea mielde dahje ovddasvástida nannosit eahpeetihkalaš doaimmain.

Departemeanta bivddii ođđajagemánus 2013 SOP strategiijaráđi árvvoštallat mo buoremusat geavahit oppalaš resurssaid ja gelbbolašvuođa, mii Ruhtadandepartemeanttas, Etihkkaráđis ja Norgga Báŋkkus lea, ja dan láhkai nannet SOP ovddasvástideaddji investerengeavada. Raporta geigejuvvui skábmamánu 20. b. 2013 ja sisdoalai logi ávžžuhusa mo nannet strategiija, earret eará mo eaiggátvuođa ollašuhttin ja fitnodagaid hilgun berrešii eanet go ovdal šaddat geavahuvvon gaskaomiid ovttaiduvvan oassin. Raporta ja ávžžuhusat sáddejuvvojedje maŋŋá almmolaš gulaskuddamii. Raporta, gulaskuddancealkámušat ja departemeantta árvvoštallamat ovddiduvvojit Stuorradiggái jagi SOP-stuorradiggedieđáhusas cuoŋománu 4. b. 2014. Stuorradiggi beassá dalle ságaškuššat strategiija, ja maiddái buot gaskaomiid ja mo ovddasvástideaddji investeremiid bargu organiserejuvvo.

Áššedovdijoavkku bargu

Čujuhuvvo árvalussii Innst. 141 S (2013–2014) ja dan meannudeapmái Stuorradikkis. SOP hálddašeami strategiijas Ruhtadandepartemeanta lea válljen máŋga gaskaoami, maid geavahit ovddasvástideaddji investeremiid oktavuođas, earret eará hilgut fitnodagaid, dárkut ja váikkuhit eaiggátvuođa bokte. Dássážii leat árvvoštallan ášši nu, ahte ii leat vuođđu sirret foanddas fitnodagaid, mat buvttadit koallafámu dahje petroleuma, nu gohčoduvvon negatiiva sirrema bokte. Leat baicce árvvoštallan beaktilut strategiijan váikkuhit áššiide eaiggádin ja dan láhkai ovddidit dálkkádatgažaldagaid ja geahččalit rievdadit áššiid, dan sadjái go hilgut fitnodagaid¹⁾.

Áššedovdijoavku galgá árvvoštallat leago koalla- ja petroleumfitnodagaid hilgun beaktilut strategiija go ahte eaiggátvuođain váikkuhit dálkkádatgažaldagaide nu ahte dilli rievdá boahtteáiggis. Áššedovdijoavkkus bivdet maid rávvagiid vejolaš kriteraid ektui, maid vuođul sáhtášii sirret dakkár fitnodagaid.

Áššedovdijoavkku barggu vuođđun galget leat loahppacealkagat, mat šaddet go meannudit SOP Strategiijaráđi ávžžuhusaid dan hárrái, mo nannet ovddasvástideaddji investeremiid.

Joavku ii galgga rávvet ovddasvástideaddji investerengeavada bajimuš strategiija hárrái iige SOP hálddašanstrategiija eará osiid hárrái.

Áššedovdijoavku galgá ovddidit ávžžuhusas ovdal skábmamánu loahpa 2014.

______________________________

1) Čielggadeamis, mii čađahuvvui ovdal etihkalaš njuolggadusaid ásaheami 2004, NOU 2003:22 Forvaltning for fremtiden (Graver-lávdegoddi), daddjui ee.: «Lávdegoddi oaivvilda ahte ii leat vuođđu negatiivvalaččat sirret foanddas fitnodagaid, mat buvttadit koallafámu dahje petroleuma. Lávdegoddi árvvoštallá beaktilut strategiijan ovddidit dálkkádatgažaldagaid ja rievdadusaid eaiggátvuođa bokte ja váikkuhemiin, go fitnodagaid hilgumiin».