Nannejit Stáhta penšuvdnafoandda hálddašeami

- Stáhta penšuvdnafoanda lea min oktasaš seastinkássa ja lea dehálaš oassi ekonomalaš politihkas. Lea stuorra rabasvuohta hálddašeami ektui. Norgga Báŋku ja Álbmotoadjofoanda lea hálddašan Stáhta penšuvdnafoandda olgoriika (SPU) ja Stáhta penšuvdnafoandda Norga (SPN) buori láhkai guhká. Ráđđehus nanne dál foandda hálddašeami vel eanet, dadjá finánsaministtar Siv Jensen.

Leat čielggadan noterekeahtes investeremiid
Dehálaš fáddá dieđáhusas leat árvvoštallamat noterekeahtes investeremiid ektui opmodagaide ja infrastruktuvrii sihke SPU:s ja SPN:s. Dieđáhusas áigot ođđasit reguleret opmodatinvesteremiid SPU:s.

Positiivvalaš vuoitu eahpesihkkaris jagis
Jagi 2015’ loahpas lei Stáhta penšuvdnafoandda oppalaš árvu 7 670 mrd. kruvnna, mas 7471 mrd. kruvnna gulai SPU:i ja 198 mrd. kruvnna ges SPN:i. Kruvdnadási gahččan lea sivvan badjel bealli SPU márkanárvvu lassáneapmái. SPU’ vuoitu lei diibmá 2,7 proseantta mihtiduvvon foandda valuhttagores, ja SPN’ vuoitu ges lei 7,0 proseantta mihtiduvvon norgga kruvnnas. Dien guovtti foandda hálddašangolut ledje 0,06 proseantta ja 0,09 proseantta foandakapitálas.

Sihke Norgga Báŋkku SPU-hálddašeapmi ja Álbmotoadjofoandda SPN-hálddašeapmi adde diibmá váile 0,5 proseantaovttadaga lassivuoittu go buohtastahttá Finánsadepartemeantta referánsaindeavssaiguin.

- Olu jagiid leat alla petroleumsisaboađut lassánahttán SPU-kapitála juohke jagi. Čuovvovaš jagiin fertet rehkenastit ahte árvoovdáneami vuosttažettiin mearrida riikkaidgaskasaš finánsamárkaniid vuoitu, dadjá finánsaministtar Siv Jensen.

Rabasvuohta hálddašeami ektui
Guovvamánu 1.b. 2016 mearridii Finánsadepartemeanta ođđa gáibádusaid raporteret ja stivret riskka SPU:s. Mandáhtta gáibida dál earret eará raporteret investerenstrategiijaid, eanet- ja unnitvuoittuid gálduid ja bohtosiid buot investerenstrategiijain mat mielddisbuktet mearkkašahtti olggosgoluid dahje stuorra relatiiva riskka. Gáibiduvvo maiddái almmolaš raporteren váldostivrra árvvoštallamis hálddašeami bohtosiin. Seammás lea Norgga Báŋkku rámma spiehkastit referánsaindeavssas lassánan veahá.

- Rabasvuohta lea iešalddis dehálaš, ja dat addá vuođu árvvoštallat hálddašeami bohtosiid. Rabasvuohta sáhttá maiddái nannet návccaid doalahit gánnáhahtti, guhkesáigásaš strategiijaid, maiddái áigodagain goas lea unnit vuoitu go referánsaindeaksa, lohká finánsaministtar Siv Jensen.

Vásttolaš hálddašeapmi
Stáhta penšuvdnafoanddas leat ruđalaš badjemihttomearit, muhto dat galgá maiddái leat vásttolaš investor. Dálkkádatvuhtiiváldimat ja ehtalaš árvvoštallamat leat guhká leamaš oassin hálddašeamis.

Guokte ođđa eavttu leat gieskat lasihuvvon ehtalaš motiverejuvvon njuolggadusaide lihccut servviid SPU:s. Nubbi guoská láhttemii mii searvedásis dohkkemeahttun muttus dagaha klimagássaid luoitimiid. Nubbi fas guoská servviide mat leat doaimmat čitnaroggamis ja čitnafámus. Dieđáhus válddahallá Etihkkaráđi, Norgga Báŋkku ja Álbmotoadjofoandda barggu jagis 2015, dása gullet álgoárvvoštallamat ođđa bargojuogus lihccut servviid ja ođđa vuordámušdokumeanta olmmošvuoigatvuođaid birra.

Loga eanet:

• Meld. St. 23 (2015–2016) Forvaltningen av Statens pensjonsfond i 2015
• Preassadieđáhus 18/2016: Noterekeahtes investeremat Stáhta penšuvdnafoanddas
• Plánššat preassakonferánssa ovdanbuktimis
• Fáddásiidu Stáhta penšuvdnafoandda birra