Bargoeallinkriminalitehta ja čáhppes ekonomiija galgá garrasit vuosttaldit

- Ráđđehus áigu garrasit vuosttaldit bargoeallinkriminalitehta ja čáhppes ekonomiija. Mii eat dohkket ahte kriminála ja lobihis aktevrrat galget beassat laskat. Mii galgat vuosttaldit lobihis ealáhusaid, dadjá ruhtadanministtar Siv Jensen (OvB).

Bargoaddikontrolla mearkkaša ahte eiseválddit besset dárkkistit raporterejit ja mákset go fitnodagat rivttes vearu ja bargoaddidivada bargiidis ovddas.  Váilevaš dahje eahpedievaslaš dárkkisteapmi sáhttá dagahit stuorit vára gilvobotnjašupmái.     

- Vearrobearrama sirdimiin mii ovttastahttit ja nannet vearu ja divadiid dárkkistandoaimmaid. Dárkkisteapmi lea deháleamos bargogaskaoapmi fuomášit bargoeallinkriminalitehta, ja dat maid váikkuha dasa ahte sii geat barget lobálaččat ožžot buoret eavttuid, dadjá Jensen.

Bargoeallinkriminalitehta ja čáhppes ekonomiija vuosttaldeapmi lea váldosivva sirdimii, muhto ii eisege dat áidna. Vearrobearrama sirdin Vearroetáhttii nanne maid vearromáksiid riektesihkkarvuođa ja sihkkarastá ovttaárvosaš meannudeami dákkár áššiin.

- Dat ii galgga leat nu ahte vearromáksi dárbbaša ballat vealahuvvomis, sorjavaš das man suohkanis son ássá, dadjá Jensen

Sirdin mearkkaša ahte šaddá álkit dilli vearromáksiide,  ja servodat seastá dainna 370 miljovnna ruvnno jahkásaččat. 

Ráđđehus áigu ásahit vearrobearrandoaimmaid 56 báikái Norggas, gos Vearroetáhtas juo leat kantuvrrat. Nie ráhkadat mii nana gelbbolašvuođabirrasiid ja ásahat stáhtabargosajiid miehtá riikka, maiddái dakkár guovlluide mat leat olggobealde stuora gávpogiid. Oslo-guovlu ii oaččo nu ollu bargosajiid, ja guhkitáiggi vuollái galget resurssat eanet juohkásit eará guovlluide riikkas. 

- Vearrogáibideaddjit gal barget buori barggu, muhto dálá organiserenvuohki ii leat doarvái buorre vuosttaldit bargoeallinkriminalitehta ulbmillaččat. Mii dárbbašat dan gelbbolašvuođa mii suohkaniin gávdno ja háliidat čađahit buorre proseassa bargiiguin, dadjá Jensen.