Ovttaoaivilvuohta nannet ovttasbarggu gaskal Norgga ja Kiinná

Stáhtaministtar Solberg, olgoriikaministtar Børge Brende ja ealáhusministtar Monica Mæland vuostáiváldojuvvojedje bures boahtinsávaldagain almmolaš galledeamis Beijingas. Dát lea vuosttaš norgga stáhtaministargalledeapmi Kiinnái 10 jagis.

- Buorre oktavuohta kiinná jođihangottiin lea deaŧalaš nanu ja diehttevaš oktavuhtii mas dovdo ahte lea goabbatbeallásaš beroštumit, luohttámuš ja ipmárdus. Mun vásihin ságastallamis ahte goappaš riikkat áiguba fas ásahit guhkesáiggi, viiddis ja boahtteáigásaš ovttasbarggu. Mii bođiimet ovttaide ásahit fásta konsulterenmekanismma politihkalaš dásis min olgoriikkadepartemeanttaid gaskka ságaskuššan dihte buot áššiid main lea oktasaš beroštupmi, sihke bilaterála ja multilaterála, dás maid olmmošvuoigatvuođat. Dat mearkkaša ahte politihkalaš gulahallanrámmat leat sajis. Dat lea áibbas dárbbašlaš jus galgá leat doaibmi politihkalaš ovttasbargu, dadjá stáhtaministtar Erna Solberg.

Maid riikkaidgaskasaš áššit digaštallojuvvojedje čoahkkimis. Dat guokte stáhtaministara digaštalaiga maid vejolaš ovttasbarggu olahit ONa ceavzilvuođamihttomeari surggiin nugo máilmmiviidosaš oahpahus ja dearvvašvuohta, ja leigga ovttaoaivilis ahte lei dárbu riikkaidgaskasaš ovttasbargui unnidan dihte dálkkádatgásaid luoitámušaid ja eastadit dálkkádatrievdamiid.

- Kiinnás lea guovddášrolla dálkkádatrievdamiid vuosttildeamis, ja mun lean dan dihte ilus go dát lea hui badjin kiinná stáhtaministara agendas, dadjá Solberg. Min davviguovllu-ovttasbargu lei maid juoga maid Stáhtaministtar Li oaivvildii ferte nannejuvvot.

Dollui almmolaš vuostáiváldinseremoniija ja stáhtaministaris lei čoahkkin Folkekongressen presideanttain, Zhang Dejiang. Stáhtaministtar Li lágidii bankeahtta gudnin iežas norgga kollegai gos maid máŋgasat kiinná ministariin oassálaste.

Stáhtaministtar Solberg ja stáhtaministtar Li čuovuiga guđa šiehtadusa vuolláičállima gaskal dan guovtti riika: šiehtadusat gusket friddjagávpešiehtadallamiid rahpamii, norgga-kiinná ekonomalaš kommišuvdnii, teknihkalaš-ekonomalaš ovttasbargui ja ovttasbargošiehtadusat valáštallama, dutkama ja dearvvašvuođa birra.

- Norggas ja Kiinnás leat ekonomiijat mat dievasmahttet nubbi nuppi. Norgga ealáhuseallimii leat stuora vejolašvuođat riikkas. Mun illudan dan dihte go mii dál fas álggahit šiehtadallamiid oažžut bilaterála friddjagávpešiehtadusa Kiinnáin ja ekonomalaš ovttasbarggu min oktasaškommišuvnnas, juoga mii lea ávkin goappaš riikkaide, dadjá Solberg.