Nanne dáistaleami ISIL vuostá

ISIL lea vuollástan guovlluid Syrias ja Irakas mearehis veahkaválddiin. Vearjoriidu ja ISILa brutála láhtten lea bággen olbmuid guođđit ruovttuideaset baluin ja doaivvuhisvuođain. ISIL ii áitta dušše dien regiovnnas. Eurohpá maiddái vásiha terrora ja veahkaválddi nugo leat oaidnán Pariissas, Brusselis ja Durkkas.

– ISILa brutála guottut ja dagut leat goddán olu siviila olbmuid ja báhtarahttán vel eambbosiid. Sii leat fallehan Eurohpá veahkaválddiin ja terroriin, ja nuorra olbmot leat radikaliserejuvvon ja oččoduvvon vierissoalddáhin. Guottuid ja daguid ferte máilbmi ovttas vuostálastit iešguđet gaskaomiiguin. Mii nannet dál norgga veahki koališuvdnii ISILa vuostá sihke ođđa militeara veahki bokte ja go nannet siviila veahki, dadjá stáhtaministtar.

Ođđa militeara veahka
Ráđđehus lea mearridan sáddet ođđa militeara veaga koališuvnna operašuvdnii. Veahka mas leat sullii 60 soalddáha, galgá veahkehit hárjehallat, ráđđeaddimiin ja operatiivvalaččat doarjut báikkálaš syrialaš joavkkuid geat ieža dáistalit ISILa vuostá. Norgga veahkis leat maiddái norgga spesiálaveagat. Norgga spesiálaveagaid stašuvdna lea Jordanas. 

– Koališuvdna lea jearahan dákkárlágan kapasitehta ja dákkár veahki atnet árvvus. Soađi galget earát soahtat, muhto mii sáhttit veahkehit sin soahtagoahtit, dadjá suodjalusministtar Ine Eriksen Søreide.

Dán operašuvnnas lea norgga veagain mandáhtta hárjehit, ráđi addit ja operatiivvalaččat doarjut syrialaš territorias jus operašuvdnakonseapta gáibida dan. Jus operašuvdnakonseapta viiddiduvvo, ja dilli gáibida hárjehallama ja doarjaga syrialaš territorias, de áigu ráđđehus ráđđádallat Stuorradikkiin dás. 

– Moai olgoriikaministariin letne odne dieđihan Stuorradikki Viiddiduvvon olgoriika- ja suodjaluslávdegoddái barggu birra, ja ráđđehus atná dehálažžan ain muitalit Stuorradiggái mo manná dáistalemiin ISILa vuostá ja norgga vehkiin, dadjá suodjalusministtar.

Lea nana riikkaidgaskasaš ovttaoaivilvuohta das ahte ISILa ferte vuostálastit. Badjel 65 riikka ja searvvi leat searvan koališuvdnii ISILa vuostá. Koališuvnnas leat sihke oarjemáilmmi riikkat ja regiovnna riikkat.

ON sihkkarvuođaráđđeresolušuvdna 2249 ávžžuha buot miellahttoriikkaid nannet dáistaleami ISILa vuostá Irakas ja Syrias. Dát resolušuvdna atná Iraka ja Syria oktan guovlun go lea sáhka ISILa lávdamis ja dan vuostálastimis. USA ja Frankriika lea koališuvnna bealis bivdán Norgga nannet iežas militeara ja siviila veahki.

– ISILa ferte vuostálastit sihke Syrias ja Irakas. Iraka kollektiivvalaš iešsuodjalus addá álbmotrievttálaš vuođu vuostálastit maiddái Syrias. Sihkkarvuođaráđi resolušuvdna 2249 doarju dán, dadjá olgoriikaministtar Børge Brende.

– Dasa lassin sáddet mii olbmuid nannet máhtu vierissoalddáhiid birra regiovnnas. Mii dárbbašit buoret dilleáddejumi eastadit ekstremismma ja radikaliserema regiovnnas ja Eurohpás, dadjá Erna Solberg.

Nannejuvvon norgga militeara veahkki ISILa vuostá sáhttá lasihit áitaga Norgga vuostá. Seammás lea riska jus ii daga maidege. Okta sivain dasa manne mii veahkehat koališuvnna lea aiddo dat ahte dáistalit ISILa vuostá ja nu geahpedit terrorfallehemiid vára Norggas ja Eurohpás. Dát lea oassi oppalaš árvvoštallamis mii lea dahkkon ovdal mearrádusa.

– Mii eat sáhte dohkkehit ahte áitagat terrororganisašuvnnain mearridit min sihkkarvuođapolitihka. ISILa vuostálastin lea guhkilmas investeren iežamet sihkkarvuhtii, dadjá suodjalusministtar Ine Eriksen Søreide.

Siviila veahkki
Norga lea maiddái nannen siviila veahki regiovnnas. 

– 2016:s veahkeha Norga oktiibuot 200 miljovnnain kruvnnain stáđásmahttindoaimmaide Irakas ja Syrias. Lea dehálaš veahkehit stáđásmahttit áitojuvvon guovlluid Irakas ja Syrias, sihke danne ahte veahkehit siviilaálbmoga guovlluin gos ISIL lea vuojehuvvon eret, ja eastadit eará ekstremisttalaš joavkkuid oažžumis coavcci, dadjá olgoriikaministtar. 

Syrias lea maiddái dárbu kártet ja čorget miinnaid dađistaga go guovllus besset friddja ISILas. Norga lea dán jagi gearggus veahkehit gitta 50 miljovnnain kruvnnain stáđásmahttindoarjaga lassin dán ulbmilii. Norga veahkeha 10 miljárddain kruvnnain njealji jagi badjel. Dát lea stuorámus humanitára veahkki goassige.