4.muddu maŋiduvvo – servodatdoaimmaid máhcahanplána 3.muddu muddejuvvo

Sivvan dasa lea earret eará ahte mii eat dieđe mo njoammundilli rievdá, man johtilit  delta-virus leavvá ja mo boahkkobuvttadeapmi ovdána. Ráđđehus ložže dattege muhtun 3.muttu ráddjehusaid servodatdoaimmaid máhcahanplánas.    

-Máhcahanplána servodatdoaimmat čađahuvvojit dieđuid vuođul eaige beaivemeriid. Lea stuorra várra ahte delta-virus njoammu sidjiide geat eai leat boahkuhuvvon, earret eará sidjiide geat leat ožžon dušše ovtta boahkkodosa dahje rašes joavkkuide. Dearvvašvuođadirektoráhta ja ÁDI ávžžuha ahte mii eat galgga johtuibidjat 4.muttu dál. Dan mii doarjut. 4. muddu ii biddjo johtui ovdal suoidnemánu loahpas dahje borgemánu álggus. Njoammundilli, buhcciid lohku, dearvvašvuođabálvalusa bargokapasitehta ja  boahkuhuvvon olbmuid lohku mearridit goas 4.muddu biddjo johtui, dadjá stáhtaministtar Erna Solberg.

Stuora Britannia ja Israel leat guokte riikka mat muitalit ahte sii leat bures lihkostuvvan maŋimuš jahkebeali, johtilis ja beaktilis boahkuheami geažil. Dattege lea delta-virusleavvan dagahan ahte Stuora Britannia lea ferten maŋidit servodatrahpama, ja Israel lea fas ferten čađahit ođđa eastadandoaimmaid maŋŋil go heaittihii eanaš eastadandoaimmaid giđđat.  

-Ráđđehus ložžii geassemánu 18.beaivvi rájes ollu ráddjehusaid mat gusket 3.muddui servodatdoaimmaid máhcahanplánas, ja mii fertet vuos oaidnit mo dilli ovdána ovdal go ložžet vel eanet. Delta-virusvariánta eará riikkain fuolastahttá, dadjá dearvvašvuođa- ja fuolahusministtar Bent Høie. 

 

3.muttu dárkilastin: Doalut koronaduođaštusain

Gaskaija rájes, duorastaga suoidnemánu 8.beaivvi diibmu 00.00 lasihat oasseválddiid logu almmolaš doaluin gos gáibiduvvo čájehit koronaduođaštusa ja varraseamos koronaiskosa.  

Oasseválddiid lohku lasihuvvo 5000 olbmos 7000 olbmui almmolaš doaluin gos koronaduođaštus ja koronaiskkus gáibiduvvo, ja buohkat galget čohkkát fásta mearriduvvon sajiin ja kohorttaid mielde (geahča tabealla dás vuollelis)

Gáibádus ahte alkohola ferte buktit beavdái bisuhuvvo, muhto gussiid gal sáhttá  luoitit sisa maŋŋil diibmu 24.00 dán lágan doaluin.  

 

Suddjejuvvon olbmot eai dárbbaš doallat gaskka sidjiide geat leat seamma joavkkus, earret jos suddjekeahtes olbmot leat mielde dahje gullet riskajovkui.

- Go buohkat geavahit koronaduođaštusa, de unnu njoammunvárra. Daid rievdadusaiguin šaddá álkit lágidit oadjebas festiválaid ja doaluid dán geasi, dadjá Solberg.

 

 

	Siste	Olgun
Fásta mearriduvvon sajit	Eanemusat 3000 olbmo (ovdal  2500 olbmo). Eanemusat 500 juohke kohorttas, ja eanemusat 50 % kapasitehtas.	Eanemusat 7000 olbmo (ovdal 5000 olbmo). Eanemusat 500 juohke kohorttas, ja eanemusat 50 % kapasitehtas.
Fásta mearriduvvon sajiid haga	Eanemusat 1500 olbmo (ovdal 1000 olbmo). Eanemusat 500 juohke kohorttas, ja eanemusat 50 % kapasitehtas.	Eanemusat 3000 olbmo (ovdal 2000 olbmo). Eanemusat 500 juohke kohorttas, ja eanemusat 50 % kapasitehtas.

Mánáidgárddit, SFO ja skuvllat fertejit ráhkkanit fiskes dássái jos njoammun leavvá ollu sajiin
Ráđđehus lea ovdal almmuhan ahte skuvllat ja mánáidgárddit fertejit ráhkkanit ruoná dássái čakčat. Delta-virusvariánta leavvá ollu sajiin ja eahpesihkkaris njoammundilli sáhttá garrasit váikkuhit mánáidgárddiide, SFO:i ja skuvllaide.

Kohorttat eai geavahuvvo ruoná dásis. Ollu oahppit ja bargit fertejit mannat erremii jos dohppehallojuvvojit njoammudávdii. Dearvvašvuođaeiseválddit árvvoštallet TISK-strategiija ruoná dási ektui mánáidgárddiin ja skuvllain.  Dilli lea ain nu ahte mánáidgárddit, skuvllat ja SFO berrejit ráhkkanit fiskes dássái, jos njoammundilli sin guovllus lea duođalaš. Dat guoská erenoamážit mánáidgárddiide ja SFO:i, mat rahpasit árabut go skuvllat borgemánus.

Errennjuolggadusat olgoriikalaš valáštalliide
Ráđđehus mudde riikii boahtima errennjuolggadusaid ja spiehkasta mátkkoštannjuolggadusain mat gusket olgoriikalaš váldovaláštalliide ja dárbbašlaš doarjjaolbmuide, go bohtet Norgii searvat riikkaidgaskasaš  valáštallandoaluide. 

Dat guoská:

• OL-jiekŋaskearrospealut, albmát, borgemánu 26.-29.b.
  
  
• Champions League ja E-cup, nissoniid ja albmáid giehtaspábbastallan borgemánus
  
  
• UEFA Champions League ja UEFA Conference League álgočiekčamat, nissonat ja albmát
  
  
• Sihkkelgilvvut Ladies Tour of Norway, Vikenis, Tour of Norway, Rogalánddas ja Arctic Race of Norway Romssas ja Finnmárkkus. Dat leat stuora, bures sajáiduvvan riikkaidgaskasaš valáštallandoalut Norggas mat lágiduvvojit borgemánus.

Sii geat oassálastet dáid valáštallandoaluin ožžot lobi johtit Norgii ja eaige dárbbaš orrut karantenahoteallas. Koronanjuolggadusat heivehuvvojit sidjiide, seamma vuogi mielde go riikkaidgaskasaš valáštallangilvvuid oktavuođas.

Riikii boahtima errennjuolggadusat galget čuvvojuvvot dihto orrunsajis. Doppe galgá sáhttit doalahit gaskka earáide, buohkain galgá leat oktolatnja, sierra basadanlatnja ja gievkkan dahje borramuš galgá buktojuvvot latnjii.

Ráđđehus árvvoštallá spiehkastit riikii boahtima mátkkoštanráddjehusain mat gusket valáštalliide ja doarjjaolbmuide geat oassálastet heaibun MM-gilvvuin, ruvddiid lovttohallan MM-gilvvuin ja curling EM-gilvvuin, mat lágiduvvojit Norggas golggotmánus ja skábmamánus. Mii háliidat valáštallansurggiin ovttas gávdnat njuovžilis riikii boahtima errennjuolggadusaid mat doibmet namuhuvvon valáštallandoaluin.