Norga jođiha davviriikkaid suodjalusovttasbarggu

Ođđajagemánu 1. b. 2014 rájes Norga jođiha davviriikkaid suodjalusovttasbarggu, NORDEFCO. – Mii háliidat ovddidit viidáseappot konkrehta ja geavatlaš ovttasbarggu, suodjalusministtar Ine Eriksen Søreide dadjala.

Norga jođiha ovttasbarggu olles 2014

- Davviriikkain leat ollu oktasaš sihkarvuođa- ja suodjaluspolitihkalaš beroštumit ja hástalusat. Mii háliidit ovddidit ain viidáseappot davviriikkaid suodjalusovttasbarggu, ja áigut sihkkarastit nu ulbmillaš, beaktilis ja relevánta ovttasbarggu go vejolaš, suodjalusministtar cealká.

 

2014 vuoruheamit

Norga háliida deattuhit dáid surggiid:

• Nannet sihkarvuođapolitihkalaš gulahallama. Ovddidit viidáseappot NORDEFCO foruman, gos gulahallet ulbmillaččat ovdáneami hárrái, mii guoská davviriikkaide.
• Nannet riikkaidgaskasaš operašuvnnaide searvama. Nannet davviriikkaid návccaid searvat beaktilis nannendoarjagiin.
• Ovdánit viidáseappot hárjehallamiid dáfus. Láhčit dilálašvuođaid davviriikkaid, davviriikkaid ja Baltia ja Nato hárjehallanprográmmaid bálddalastimii.
• Beavttálmahttojuvvon nákca- ja materiálaovttasbargu. Vuoruhit áŋgiruššamiid ja stábanávccaid ovttasbargui, mas lea stuorámus potentiála ja seammás nagodit bissehit doaimmaid, mat eai ovdán.
• Ovddidit davviriikkaid návccaid hukset kapasitehtaid ja doarjut sihkarvuođasuorggi ođasteami. Olahit stuorát beavttu dan láhkai, ahte deattastit leveránssaid NATO:i, ON:i ja EU:i, ja dan bokte ahte bovdet eará riikkaid searvat.
• Buoret industriijagulahallan. Bargat dan ovdii ahte davviriikkain ja guovllu suodjalusindustriijas lea buorre gulahallan.
• Public-private partnerships (PPP). Ollašuhttit standardiserejuvvon davviriikkaid PPP-vuogádaga, man vuođul sáhttet lonuhallat vásáhusaid, «best practices» ja sullasačča riikkaid gaskkas ja go gulahallat industriijain.

Duogás

NORDEFCO ásahuvvui 2009 ja buhtadii ovddit suodjalusovttasbarggu ovttasbargoorgánaid ja bargojoavkkuid. Norga, Ruoŧŧa, Dánmárku, Suopma ja Islánda servet. Loga eanet neahttasiiddus www.nordefco.org