Sámi ofelaččat – sáhkavuorru  Riddu Riđđu 2016

Vuosttažettiin sávvan lihku Riddu Riđđui 25-jagi ávvudemiin! Riddu Riđđu lea sihke eallinfámolaš ja deaŧalaš festivála, sihke sámi- ja álgoálbmotperspektiivvas. Festivála leage leamaš mielde báidnimin ovtta olles sámi buolvva, ja doaivumis maiddái dán njealji ofelačča geaid otne almmustahttán.

Dii geat dás čuožžubehtet ja galgabehtet ofelažžan doaibmat boahtte skuvlajagi lehpet:

•  Maja Sofie Larsen Fjellström
• Oda Kjær Eriksen
• Knut Mikkel Hætta
• Ole Nicklas Mienna Guttorm

Din doaibma čavčča rájes lea mátkkoštit skuvllaid mielde ja eará arenain miehta riikka ja muitalit eará nuoraide sámi kultuvrra ja sámi servodateallima birra. Boahtte skuvlajagi galgabehtet ovddastit sámi servodaga ja sámi nuoraid. Dat lea dehálaš ámmát. Ain gávdnojit ollugat geat dihtet hui uhcán sámi kultuvrra birra. Eanet máhtolašvuohta eastada vealaheami.

Ovddeš ofelaččat leat muitalan dan ahte doaibmat ofelažžan sáhttá leat gáibideaddji ja lea juoga maid ii goassige sáhte vajálduhttit. Sáhttá leat gáibideaddji muitalit áššiid birra mat gusket iežas identitehtii ja go galgá čilget iežas kultuvrra, ja muitalit movt lea eallit sápmelažžan.

Skuvllat leat maid iešguđetláganat. Dat ii leat álo nu ahte seamma sisdoallu heive buot skuvllaide maid galledehpet, ja gažaldagat sáhttet maid molsašuddat skuvllas skuvlii. Dat gáibida sihke čehppodaga, vásáhusaid ja návccaid improviseret.

Lihkus beassabehtet ráhkkanit. Oahppu maid Sámi Allaskuvla lágida lea hirbmat ávkkálaš. Háliidan giitit Sámi Allaskuvlla dan barggu ovddas maid dii bargabehtet hálddašit ja organiseret ofelašortnega.

Lea dehálaš ahte dii geat bargabehtet ja johtibehtet ofelažžan, bures gulahallabehtet ja ahte dii dievasmahttibehtet guđet guimmiideattet go bargabehtet joavkun.   Lean dadjan dan ovdal – dat lea áibbas čielggas ahte Sámi allaskuvla ovddida joavkojođiheami hui alla dásis! Ofelaččain dábálaččat gáibiduvvo ahte sii nagodit ovdánahttit buorre  bargovuoiŋŋa vai ovttas nákcejit čađahit dán dehálaš doaimma.

Ofelaččaid nammadeapmi lea šaddan bistevaš, jahkásaš dáhpáhus dánlágan festiválain. Giitu Riddu Riđu lágideddjiide  go mii dán festiválas beassat rámidit ja čalmmustahttit sihke ođđa ja ovddeš ofelaččaid!

Maien Gaup Sandberg, Elle-Mari Dunfjell Oskal, Lisa Kaisa Skoglund Vesterheim ja Elle-Káre Somby: Giitu didjiide geat lehpet geargan sámi ofelažžan ja giitu barggu ovddas maid lehpet čađahan maŋimuš skuvlajagi.

Dii lehpet bargan hui buorre barggu! Mus leai lihkku go bessen leat mielde go dii galledeiddet Oslo skuvllaid diimmá čavčča, gos maiddái stáhtaráđđi Sanner oassálasttii. Leai buorre vásáhus oaidnit ja gullat din – hirpmástuvven man čehpet dii nagodeiddet ohppiid geasuhit. Stáhtaráđđi logai maŋŋil ahte dii lehpet čeahpes pedagogat. Doaivvun ahte dii iluin muitibehtet dán skuvlajagi.  

Ja didjiide geat dál joatkibehtet  –   Maja Sofie Larsen Fjellström; Oda Kjær Eriksen, Knut Mikkel Hætta ja Ole Nicklas Mienna Guttorm. Din ovddabealde lea gelddolaš ja vásihusrikkis jahki. Giitu didjiide go lehpet badjelasadet váldán  dán dehálaš doaimma. Sihkkarit boahtibehtet vásihit hástalusaid – muhto maid ollu suohttasiid! Lihkku didjiide!