Gieldaođastusa ekspeartalávdegoddi lea geigen loahpparaporttastis.

Gieldaođastusa ekspeartalávdegoddi geigii otne iežas loahpparaportta gielda- ja ođasmahttinministerii Jan Tore Sanner.
-Fágalaš árvalusat maid mii leat ožžon lávdegottis leat dehálaččat go galgat árvvoštallat bargguid maid sáhttá sirdit stuorit ja fámoleabbo gielddaide, cealká stáhtaráđđi.

Lávdegoddi lea loahpparaporttas geahčadan eavttuid maid gielddat galget deavdán ovdal go sáhttet badjelasaset váldit ođđa doaimmaid. Lávdegoddi lea árvvoštallan makkár doaimmaid sáhtašii sirdit. 

-Ekspeartalávdegotti raporta čájeha ahte stuorit gielddat ožžot eanet doaimmaid ja ovddasvástádusa. Dat addá ássiide buoret čálgofálaldagaid ja gielddaide buoret vejolašvuođaid fuolahit daid ássiid geat dárbbašit veahki eanemusat. Dan lassin besset gielddat buorebut hábmet báikkálašservodagaid nugo ieža háliidit, dadjá Sanner.

Ekspeartalávdegotti árvalusat

Oasseraporttas, mii ilmmai njukčamánus, árvvoštalai ekspeartalávdegoddi earret eará ahte gielddain fertejit unnimusat 15 000 – 20 000 ássi ovdalgo ássiide sáhttá sihkkarastit buriid fálaldagaid. Lávdegoddi bisuha dán árvvoštallama iežas loahpparaporttas, ja oaivvilda ahte dat ferte leat eaktun jos gielddat galget oažžut ođđa doaimmaid.

Lávdegoddi lea čalmmustahttán daid nu gohčoduvvon doaibmi servodatovddidansurggiid guoskevaš eavttuid. Sii oaivvildit ahte gieldaráját dat galget čájehit gos olbmot ásset, ellet ja barget.  

-Mii ássat dábálaš guovlluin, doalvut mánáid mánáidgárdái, mannat bargui ja oassálastit astoáiggefálaldagain. Mu mielas ekspeartalávdegoddi oaivvilda servodagat mat ovttas barget  doibmet maid ovttas. Dat lea mielde hábmemin lunddolaš oktavuođaid sidjiide geat doppe orrot ja fitnodagain lea maid buoret vejolašvuođat ovdánit, cealká Sanner.

Stuoradiggedieđáhus giđđat 2015

-Gieldaođastusain mii háliidat sirdit eanet fámu ja ovddasvástádusa gielddaide ja sirdit eanet doaimmaid lagabui ássiid, dadjá Sanner.

Gielda- ja ođasmahttindepartemeanta áigu ovddidit stuoradiggedieđáhusa doaimmaid birra maid sáhtašii sirdit stuorra ja nana gielddaide giđđat 2015.  

-Stuoradiggi áigu de meannudit árvalusa gielddaid ođđa doaimmaid birra ovdalgo gielddat báikkálaččat dahket mearrádusaid, cealká Sanner.

Stuoradikki geassemánu mearrádusa čuovvoleami oktavuođas lea maid regionála álbmotválljenođastus fáddá stuoradiggedieđáhusas. 

-Gielddat divaštallet dál miehtá riikka movt sii galget iežaset organiseret vai lea vejolaš ássiide fállat nu buriid fálaldagaid go vejolaš boahtteáiggis. Gielddalaš Raportta dieđuid mielde leat 250 gieldda álggahan dán barggu. Sii čájehit ahte sis leat jođihannávccat ja háliidit boahtteáigásaš čovdosiid iežaset ássiide, loahpaha Sanner.

Geahča maid:

• Gielddastruktuvrra eavttuid
  Ekspeartalávdegotti loahpparaporta, juovlamánu 2004 (girjegiella)
• Gieldaođastusa ja viidáset proseassa stáhtus (girjegiella)
• Preassakonfereanssa bádden neahtta-TV:ii
• Lávdegottejođiheaddji Signy Vabos ovdanbuktin (girjegiella, pdf)