Láigoviesuid erenoamáš áŋgiruššan

- Eanaš Norgga ássiin lea buorre ássandilli. Muhto gávdnojit maiddái olbmot geain lea heajos eallindilli.  Láigovisttiid erenoamáš áŋgiruššan galgá mielddisbuktit ahte eanet ássit ožžot buorre ássanviesu, cealká gielda- ja ođasmahttinministtar Jan Tore Sanner.

Gielddat galget háhkat ássansaji dakkáriidda geat ieža eai nákce dan dahkat. Olu gielddain eai gávdno heivvolaš ássanviesut sin várás geat rahčet ássanviessomárkanis. Dat guoská maiddái báhtareddjiide geat lobálaččat ásset Norggas.

Ráđđehus árvala de jagi 2014 reviderejuvvon nationálabušeahtas lasihit juolludusrámma 222 miljovnna kruvnnuin, oktiibuot sullii 795 miljovnna kruvnnu. Ollislaš rámma addá vejolašvuođa hukset sullii 1500 ássanviesu dán jagi. Árvalus mielddisbuktá lassi juolludusdárbbu 100 miljovnna kruvnnu sturrosaš poasttas 2014:s.

Ráđđehus ovddidii njukčamánus nationála strategiija ássanviessososiálalaš doaimmaide, (“Čálggolaš ássanviesut”) “Bolig for velferd” (2014-2020).

- Dan oktavuođas leat mis gudneáŋgiris mihttomearit. Dál mii ollašuhttit lohpádusaid. Mii áigut duođaid áŋgiruššat ahte sii geat eanemusat rahčet ássanviessomárkanis, ja mánnábearrašat ja nuorat vuoruhuvvojit ovddemussii, cealká stáhtaráđđi.

• Reviderejuvvon nationálabušeahtta 2014 – Dieđ.St.2 (2013-2014) (girjegiella)