Sanner ráidovázzimis Bonju Sápmelaččaiguin ovttas

- Mun háliidan doarjut Bonju Sápmelaččaid ja illudin searvat singuin ráidovázzimis  lávvardaga, cealká gielda- ja ođasmahttinministtar Jan Tore Sanner, gii ovddasvástida sámi áššiid Ráđđehusas.

Europride-festivála loahpahuvvo ráidovázzimiin Oslo gáhtain lávvardaga. Bonju Sápmelaččat vázzet sierra joavkun dán ráidovázzimis. Lassin dan lea vel Queering Sápmi čájálmas Pride Park:s Ráđđeviesu šiljus.

- Mus lea stuora beroštupmi máŋggabealátvuhtii ja dasa ahte olbmot dohkkehit guhtet guimmiideaset. Politihkkárin lea mis ovddasvástádus fuolahit ahte mis lea buorredáhtolaš servodat gos lea sadji buohkaide, dadjá Sanner.

Sámi homofiillaid ja lesbbaid fierpmádat ásahuvvui jagi 2002. Fierpmádaga doaibma lea  buoridit olbmuid guottuid ja ovddidit diehtojuohkima homofiliija birra sámi birrasiin. 

Ráidovázzin álgá dii. 13 Oslo gávpotguovddážis lávvardaga.

- Go olbmot rahpasit čájehit geat sii leat, de dat mielddisbuktá buoret áddejumi ja máhtolašvuođa. Mun jáhkán ahte čalmmustahttin lea mielde jávkadeamen ovdagáttuid, Sanner lasiha.

FAFO čađahii jagi 2009 eallindileguorahallama lesbbaid ja homofiillaid birra Sámis. Guorahallan čájehii ee. ahte sámi lesbbat ja homofiillat lea joavku man birra lea hui jaskat.

FAFO-guorahallan čájeha ahte sohkabealerollat, bearašoktavuođat, árbevierut, vealaheapmi ja guottut váikkuhit dasa ahte šaddá hui váttis leat homofiila dahje lesba sámi birrasis. Dán guorahallamis muitaledje ollugat ahte jávohisvuohta homoseksualitehta ektui, garra oskkolaš birrasat, identitehta gažaldagat ja dat ahte eallit smávva servodagain čuhcet psykalaččat hui garrasit.