Ráđđehus háliida sullii 10 regiovnna

Stuoradiggi lea mearridan ahte golbma álbmotválljendási galget bissut. Dainna vuolggasajiin ovddida ráđđehus stuoradiggedieđáhusa regiovdnaođastusa birra. –Dál lea áigi láddan stuorit ja beaktilis regiovnnaide. Regiovnnat mat ovttasdoibmet, gullet oktii. Dat berrejit ovttasráđiid dustet hástalusaid ja vejolašvuođaid, dadjá Gieldda- ja ođasmahttinministtar Jan Tore Sanner.

Ráđđehus čađaha moanat ođastusaid čoavdit otná ja boahttevaš hástalusaid. Stuoradiggi bivddii geassemánus 2015 ráhkadit dieđáhusa regiovnnaid ođđa doaimmaid birra. Stuoradiggi deattuhii ahte stuora regiovnnat leat ovdehussan vejolašvuhtii oažžut stuorit váikkuheami ja čađahit ođđa doaimmaid.

Áigi ođastussii

Ráđđehus evttoha ahte stuorit regiovnnat galget čielgaseappot ovddasvástidit iežaset guovllu servodatovdáneami. Dieđáhusas evttohuvvojit doaibmabijut nannet regiovnnaid vejolašvuođaid mearridit eavttuid iežaset ovdáneapmái ja ovttasbargui gaskal gielddaid, regiovnnaid ja stáhta. Árvaluvvo sirdit doaimmaid ja ovddasvástádusa muhtun surggiin. Earret eará johtolagas, kulturmuitosuodjaleamis, kultuvrras, ealáhusovdánahttimis ja olggustallamis.

Fylkkaráját leat mearriduvvon 1800-logu gaskkamuttus, ja dat eai leat rievdaduvvon. Dan rájes lea ođđaáigásaš Norga ovdánan. Johtolatoktavuohta ja siskkáldas struktuvra, ealáhuseallin ja ássan leat hirbmadit rievdan.

-Dálá fylkkastruktuvra lea boaresáigásaš. Dál lea dárbu geahčadit guovlluid ja doaibmabijuid  stuorit oktavuođas. Dál lea dárbu hálddašit ja meannudit áššečuolmmaid nugo dálkkádatáššiid ja dálkkádatheiveheami, bálddalastojuvvon areála- ja johtolatplánaid, ealáhuseallima nuppástuhttimiid ja gelbbolašvuođaovdáneami maid servodat dárbbaša, joatká stáhtaráđđi Jan Tore Sanner.

Ráđđehus háliida sullii 10 regiovnna

Stáhta lea organiseren iežas regionála doaimmaid iešguđetlágan hámis. Fylkkarájáid ja stáhta etáhtaid regiovdnarájáid gaskka leat stuora erohusat dál. Stáhtas leat eanaš stuorit regiovnnat go fylkkat. Dát organiserenvuohki heađušta buori ovttasbarggu stáhta ja fylkkaid gaskka ja stáhta siskkobealde, ja lea hehttehussan beaktilis hálddašeapmái.

Stáhta oaivvilda ahte jos fylkkagielddaid geahpeda beliin, de dat láhčá dilálašvuođaid beaktilis ovttasdoaibmamii regiovnnaid ja stáhta gaskka. Ráđđehus áigu maid geahčadit stáhtalaš regiovdnarájáid regionála álbmotválljendási ođđa rájáid ektui.

-Regiovdnaođastus lea dehálaš gaskaoapmi ovddidit buresdoaibmi ja beaktilis hálddašeami, cealká Sanner, ja čujuha buvttadankommišuvnna árvvoštallamii gos čujuhuvvo ahte “Buorre ovttasdoaibma gaskal stáhtalaš sektorhálddahusa ja gielddalaš ja fylkkagielddalaš hálddahusa lea vuođđun beaktilis hálddašeapmái”.

Fylkkagielddat fertejit váldit stivrejumi boahtteáiggiset badjel

Diimmá geasi bovdii Gieldda- ja ođasmahttinministtar Jan Tore Sanner fylkkagielddaid ja Oslo gieldda álggahit ránnjáságastallamiid, nugo son lea dahkan gielddaid ektui. Fylkkat galget ovdal áigemeari juovlamánu 1.b. 2016 mearridit gielddaovttastumi. 

-Dál lea fylkkagielddain vejolašvuohta beassat njunnošii ja ovddidit boahtteáigásaš regionála struktuvrra man bokte sii besset mearridit servodatovdáneami ja stivret dehálaš servodatsurggiid, loahpaha gieldda- ja ođasmahttinministtar.

Ođđa álbmotválljenregiovnnat – rollat, struktuvrrat ja doaimmat