Divtasvuona suohkan oadtju 2,4 millijåvnå kråvnå luohtádusnannima prosjæktaj
Historjjálaš arkiiva
Almmustahttináigodat Solberga ráđđehus
Almmustahtti: Gielda- ja ođasmahttindepartemeanta
Preassadieđáhus | Almmustahtton: 18.12.2017
– Råhtsatjimássje ma Divtasvuona suohkanin bihkusin svatjádi mijáv divnajt. Mij lip biedjam jåhtuj moadda dåjma viehkedittjat vaháguvvamijt ja lagámusájt, ja dåjmajda ma buorre åvddånimev vájkkudi. Mij juollodip duodden 2,4 millijåvnå kråvnå prosjæktaj mij galgga luohtádusáv nannit bájkálasj sebrudagán Divtasvuonan. Ájnas le nannit luohtádusáv sáme álmmuga ja almulasj oajválattjaj gaskan, javllá suohkan- ja ådåsmahttemminisstar Jan Tore Sanner.
Suohkan- ja ådåsmahttemdepartemænnta juollot 2, 4 millijåvnå kråvnå guovte jahkáj luohtádusnannim prosjæktaj Divtasvuona suohkanin. Prosjækta le oassen oatsodimplánas råhtsatjimássjij maŋŋáj ma bihkusin Divtasvuonan.
Rudá mávseduvvi Divtasvuona suohkanij jagen 2018 ja 2019, ja manni Árran julevsáme guovdátji gænna le guovdásj roalla dán prosjevta hárráj.
– Luohtádus le sierraláhkáj ájnas gå barggo galggá joarkeduvvat ja galggap oadtjot buorre dåjmajt oatsodimplánan. Árran le ájnas aktørra bájkálattjat gænna le buorre máhtukvuohta máhttet nannit dav gasskasasj luohtadusáv sámeálmmuga ja almulasj oajválattja gaskan, ja vaddet ájnas kultuvrramáhtudagáv. Árrana oassálasstemijn nanniduvvá máhttelisvuohta vuorbástuvátjit oatsodimdåjmåj, javllá Jan Tore Sanner.
Suohkan- ja ådåsmahttemdepartemænnta le åvdebut juollodam 7, 5 millijåvnå kråvnå Divtasvuona suohkanij jagijda 2017 – 2019 oatsodimbargguj råhtsatjimássjij maŋŋáj.
Pládna oatsodimdåjmajda Divtasvuona suohkanin le dagádum, gånnå oajvvaduvvi dåjma oanep ja guhkep ájggáj. Galggá bargaduvvat hæhkka gergasvuodajn ja vaháguvvamij, illastiddjij ja lagámusáj oatsodimijn, mánáj ja nuoraj åhpadusájn, bigodimmáhtudagájn ja rutijnaj diededimvælgo hárráj, ja duodden dagáduvvat ålles bajásjaddampládna suohkana hárráj.
Bájkálasj prosjæktajådediddje, guhti galggá jådedit bargov oatsodit vaháguvvamijt, ja jåhtuj biedjat guhkesájggásasj, duostodim dåjmajt mij galggá hieredit ådå seksuála råhtsatjimijt mánáj ja nuoraj vuosstij, le virggájbiejadum ådåjagij rájes jagen 2018. Vuododuvvam le aj stivrrimjuogos gånnå Fylkamánne Nordlándan, politija, Divtasvuona ja Hábmer suohkan ja Árran julevsáme guovdásj, gænna le badjásasj åvdåsvásstádus prosjæktastivrrimis ja koordinerimis prosjevtaj gaskan oatsodimplánan.
Sváldas Fylkamánne Nordlándan næhttabælláj Divtasvuona prosjevtan.
Suohkan- ja ådåsmahttemdepartementa præssatelefåvnnå: 22 24 25 00