Ođđa sámi ofelaččat 2017-2018
Historjjálaš arkiiva
Almmustahttináigodat Solberga ráđđehus
Almmustahtti: Gielda- ja ođasmahttindepartemeanta
Preassadieđáhus | Almmustahtton: 28.07.2017
– Sávan didjiide geat dál galgabehtet doaibmat ofelažžan ollu lihku bargguin. Ofelašdoaibma lea hui gáibideaddji, muhto dii oažžubehtet ollu ruovttoluotta! Dii oažžubehtet ovtta jagi mii dahká ahte oahppabehtet ollu ja mii šaddá hui gelddolaš ja somá, celkkii stáhtačálli Anne Karin Olli, Gieldda- ja ođasmahttindepartemeanttas, go Márkomeannu-festiválas Romssas almmuhii ođđa sámi ofelaččaid.
Ođđa sámi ofelaččat skuvlajahkái 2017-18 leat:
- Anne-Marja Kristine Jannok-Joma
- Dan-Jonas M. Danielsen Sparrok
- Leif Henrik Halvari
- Maren Benedicte Storslett
Ofelaččat galget deaivat nuoraid miehtá Norgga, ja gaskkustit dieđuid sámi servodaga birra iežaset vásáhusaid vuođul. Dán jagi ofelaččain lea ovdamunni dat go sis lea iešguđetlágan duogáš ja bohtet iešguđet guovllus Sámis.
– Háliidan giitit Sámi allaskuvlla dan barggu ovddas maid dii bargabehtet hálddašit ja organiseret ofelašortnega. Seammás áiggun maiddái giitit Márkomeannu-festivála lágideddjiid go ofelaččat besset oassálastit festiválas, dajai Anne Karin Olli.
Márkomeannu-festivála lea sámi kultur- ja musihkkafestivála, mii lea beaggigoahtán nanu ja buorre sámi kulturgaskkusteaddjin. Festivála lágiduvvo Gállogietti sámi olgomuseas Evenáššis. Musea lea Nordlándda ja Romssa fylkkaráji alde, ja dan jođiha Várdobáikki sámi guovddáš.